ടിപി ചന്ദ്രശേഖരനും അമ്മയുണ്ടായിരുന്നു, ഹൃദയം പൊട്ടിയാണവര്‍ മരിച്ചതെന്ന് കെകെ രമ

കൊച്ചി. ടിപി ചന്ദ്ര ശേഖരനും അമ്മയുണ്ടായിരുന്നുവെന്നും അവര്‍ ഹൃദയംപൊട്ടിയാണ് മരിച്ചതെന്നും കെകെ രമ എംഎല്‍എ. ടിപി വധക്കേസ് പ്രതികള്‍ക്ക് പരമാവധി ശിക്ഷനല്‍കണമെന്ന് ആവശ്യപ്പെട്ട് നല്‍കിയ ഹര്‍ജിയില്‍ ഹൈക്കോടതിയിലെ പ്രതികളുടെ വാദങ്ങളോട് പ്രതികരിക്കുകയായിരുന്നു രമ.

വധശിക്ഷ വിധിക്കാതിരിക്കാന്‍ എന്തെങ്കിലും ബോധിപ്പിക്കാനുണ്ടോ എന്ന ചോദ്യത്തിന് വീട്ടില്‍ പ്രായമായ അമ്മ മാത്രമേ ഉള്ളുവെന്നാണ് കിര്‍മാണ് മനോജിന്റെ വാദം. ഏറ്റവും മൃഗീയവും ക്രൂരവുമായ കൊലപാതകമാണിതെന്നും അപൂര്‍വമായ കൊലപാതകമാണെന്നും അത് കോടതിക്ക് ബോധ്യമായിട്ടുണ്ടെന്നും അതിനുസരിച്ചുള്ള ശിക്ഷ കൊടുക്കണമെന്നുമാണ് പ്രതീക്ഷിക്കുന്നത്.

ക്യാപിറ്റല്‍ പണിഷ്‌മെന്റാണ് ആഗ്രഹിച്ചത്. ഇത്തരം കാര്യങ്ങള്‍ കോടതി വിശദമായി പരിശോധിക്കുന്നുണ്ടെന്നും രമ വ്യക്തമാക്കി. വിവാഹം കഴിച്ച് ഭാര്യയുണ്ട്, മക്കളുണ്ട്, കുടുംബത്തോടൊപ്പം പുറത്ത് താമസിക്കണം എന്നെല്ലാമാണ് പ്രതികള്‍ പറഞ്ഞത്. പ്രതികള്‍ക്ക് അവരുടെ വാദം ഉന്നയിക്കാമെന്നും രമ.

ടിപിക്ക് ഒരു അമ്മയുണ്ടായിരുന്നു ഹൃദയം പൊട്ടിയാണ് അവര്‍ മരിച്ചത്. അവിടെ ഇരിക്കുമ്പോള്‍ ആ അമ്മയുടെ അടുത്തായിരുന്നു. പക്ഷെ ഇങ്ങനെ ചെയ്യുന്നവര്‍ മറ്റുള്ളവര്‍ക്കും കുടുംബം ഉണ്ടെന്ന് ഓര്‍ത്തില്ലെന്നും അനുഭാവപൂര്‍വ്വമായ വിധിയുണ്ടാവുമെന്നാണ് പ്രതീക്ഷിക്കുന്നതെന്നും അവര്‍ വ്യക്തമാക്കി.