കൊച്ചിയിലെ നവകേരള സദസ്സ് നാളെയും മറ്റന്നാളുമായി നടക്കും

കൊച്ചി : കൊച്ചിയിൽ നവകേരള സദസ്സിന്റെ മാറ്റിവച്ച 2 ദിവസത്തെ പരിപാടികൾ ജനുവരി 1, 2 തീയതികളിൽ തൃക്കാക്കര, പിറവം, തൃപ്പൂണിത്തുറ, കുന്നത്തുനാട് നിയോജക മണ്ഡലങ്ങളിൽ നടക്കും. ഒന്നിന് ഉച്ചകഴിഞ്ഞ് 3നു തൃക്കാക്കര മണ്ഡലത്തിലേതു കാക്കനാട് സിവിൽ സ്‌റ്റേഷൻ പരേഡ് ഗ്രൗണ്ടിലും വൈകിട്ട് 5നു പിറവം മണ്ഡലത്തിലേതു പിറവം കെഎസ്ആർടിസി സ്റ്റാൻഡ് ഗ്രൗണ്ടിലും നടക്കും.

ജനുവരി രണ്ടിന് തൃപ്പൂണിത്തുറ മണ്ഡലത്തിലേത് ഉച്ചകഴിഞ്ഞ് 3ന് പുതിയകാവ് ക്ഷേത്ര മൈതാനത്തും കുന്നത്തുനാട് മണ്ഡലത്തിലേതു വൈകിട്ട് 5നു കോലഞ്ചേരി സെന്റ് പീറ്റേഴ്സ് ഗ്രൗണ്ടിലും നടത്തും. ഡിസംബർ 9 ന് നടക്കേണ്ട നവകേരള സദസ്സ്, സിപിഐ സംസ്ഥാന സെക്രട്ടറി കാനം രാജേന്ദ്രന്റെ നിര്യാണത്തെ തുടർന്നാണു മാറ്റിവച്ചത്.

ഈ മാസം എട്ടിനാണ് കാനം രാജേന്ദ്രൻ അന്തരിച്ചത്. 73 വയസായിരുന്നു. ഹൃദയാഘാതത്തെ തുടർന്നായിരുന്നു അന്ത്യം. കൊച്ചിയിലെ ആശുപത്രിയിലായിരുന്നു അന്ത്യം. രോഗബാധിതനായി കുറച്ചുനാളായി ആശുപത്രിയിലായിരുന്നു. രക്തത്തിലെ പഞ്ചസാരയുടെ അളവ് കൂടിയതിന് തുടർന്ന് കാൽപാദം മുറിച്ച് മാറ്റേണ്ടി വന്നിരുന്നു. ആശുപത്രിയിൽ ചികിത്സയിൽ ഇരിക്കെ ശ്വാസതടസം നേരിടുകയും ഹൃദയാഘാതം സംഭവിക്കുകയും മരണം സ്ഥിരീകരിക്കുകയുമായിരുന്നു.

കോട്ടയം വാഴൂർ സ്വദേശിയാണ്. പാർട്ടി സംസ്ഥാന സെക്രട്ടറി ചുമതലയിൽ നിന്നും മൂന്നുമാസത്തെ അവധിക്ക് അപേക്ഷ നൽകിയിരിക്കെയാണ് അന്ത്യം. 2015 മുതൽ സിപിഐയുടെ സംസ്ഥാന സെക്രട്ടറിയാണ്.