ഹോം വർക്കുകൾ ചെയ്ത് തീർത്തു, തിങ്കളാഴ്ച്ച മുതൽ സ്കൂളിൽ പോയി തുടങ്ങും, പ്രതികളെ പിടികൂടിയതിൽ സന്തോഷമെന്ന് കുട്ടിയുടെ അച്ഛൻ

കൊല്ലം: ഓയൂരിൽ ആറ് വയസുകാരിയെ തട്ടിക്കൊണ്ടുപോയ കേസിൽ ​പ്രതികളെ പിടികൂടിയതിൽ സന്തോഷമെന്ന് കുട്ടിയുടെ അച്ഛൻ. അന്വേഷണ സംഘത്തിന് അഭിനന്ദനം അറിയിക്കുന്നുവെന്നും ചില മാധ്യമങ്ങളിൽ തെറ്റിദ്ധാരണ പരത്തുന്ന വാർത്തകൾ വന്നതിൽ വേദനയുണ്ടെന്നും കുട്ടിയുടെ അച്ഛൻ പറഞ്ഞു. മകൾ ഹോം വർക്കുകൾ ചെയ്തു തീർത്തു. തിങ്കളാഴ്ച്ച മുതൽ സ്കൂളിൽ പോയി തുടങ്ങുമെന്നും കുട്ടിയുടെ അച്ഛൻ കൂട്ടിച്ചേര്‍ത്തു

‘കഴിഞ്ഞ ആറു ദിവസമായി നിങ്ങളെയും ഞങ്ങളെയും ലോകം മുഴുവനെയും മുൾമുനയിൽ നിർത്തിയതായിരുന്നു എന്റെ കുഞ്ഞിന്റെ തട്ടിക്കൊണ്ടു പോയതുമായി ബന്ധപ്പെട്ടുള്ള കാര്യം. കുഞ്ഞിനെ തിരികെ കിട്ടി. അതിന്റെ അന്വേഷണവുമായി കാര്യങ്ങളൊക്കെ മുന്നോട്ടു പോയി. അതിന്റെ ഭാഗമായി ഇതിൽ കുറ്റകൃത്യം ചെയ്ത മൂന്നു പേരെയും പൊലീസ് പിടിച്ചിട്ടുണ്ട്.

മാധ്യമങ്ങളും സമൂഹമാധ്യമം, കേരള സമൂഹം തുടങ്ങി എല്ലാവരും ഒരുമിച്ചു നിന്നതുകൊണ്ടാണ് ഇതിന് ഒരു പരിസമാപ്തിയിലേക്ക് എത്തിച്ചേരാൻ സാധിച്ചത്. എഡിജിപി അജിത്കുമാർ സാറും നിശാന്തിനി മാഡവും അവരുടെ ടീമിനെ ഏകോപിപ്പിച്ച് വളരെ കാര്യക്ഷമമായ അന്വേഷണമാണ് നടത്തിയത്. അന്വേഷണ ഉദ്യോഗസ്ഥർ എന്നെ വിളിച്ച് ധൈര്യം പകർന്നിരുന്നു. അതുകൊണ്ടുതന്നെ ഞാൻ തളർന്നു പോകാതെ ധൈര്യത്തോടെയാണ് നിന്നതെന്നും റെജി പറഞ്ഞു.