കൊട്ടിയൂർ വൈശാഖ മഹോൽസവം തുടങ്ങി

ദക്ഷിണ കാശി എന്നറിയപ്പെടുന്ന കൊട്ടിയൂരിൽ വൈശാഖ മഹോത്സവത്തിന് തുടക്കമായി.കണ്ണൂർ ജില്ലയിലെ കൊട്ടിയൂരിൽ വനത്തിനുള്ളിലായി നിലകൊള്ളുന്ന അക്കരെ കൊട്ടിയൂർ 28 ദിവസം നീളുന്ന ഉൽസവത്തിനായി തുറന്നു. ജൂണ്‍ 1 ന് നെയ്യാട്ടതോടെ ആരംഭിച്ച് 28ന് നടക്കുന്ന തൃക്കലശാട്ടതോടെ സമാപിക്കും.

നെയ്യാട്ടത്തില്‍ ആരംഭിച്ച് തൃക്കലശാട്ടില്‍ അവസാനിക്കുന്ന ഈ ഉത്സവമഹാമഹം കാണുവാന്‍ ലക്ഷ കണക്കിനു ആളുകൾ എത്തും.സ്വയംഭൂലിംഗം ആരാധനാമൂര്‍ത്തിയായുള്ള അക്കരെ കൊട്ടിയൂരില്‍ പക്ഷെ ക്ഷേത്രസംബന്ധിയായ നിര്‍മ്മിതികള്‍ ഒന്നും തന്നെയില്ല. കല്ലുകള്‍ കൂട്ടി വച്ച മണിത്തറ എന്നു വിശേഷിപ്പിക്കുന്ന പവിത്രസ്ഥാനത്താണ് സ്വയംഭൂലിംഗ പ്രതിഷ്ഠ സ്ഥാപിച്ചിരിക്കുന്നത്. സ്വയം ഭൂവിനു ചുറ്റും പർണ്ണ ശാലകളാണ്‌.

അക്കരെ കൊട്ടിയൂരിലെ ഈ ക്ഷേത്രത്തില്‍ ഉത്സവകാലത്തു മാത്രമേ ആരാധന നടത്താറുള്ളൂ.കൊട്ടിയൂര്‍ വൈശാഖ മഹോത്സവം .ഉത്സവത്തോടനുബന്ധിച്ചുള്ള മുതിരേരി വാള്‍ വരവ് ക്ഷേത്രത്തിലെത്തി.വയനാട്ടിലെ മുതിരേരി ക്ഷേത്രത്തിൽ നിന്നുള്ള വാൾ എഴുന്നളളത്ത് സന്ധ്യയോടെ ഇക്കരെ ക്ഷേത്രത്തിലെത്തി. എടയാർ മൂഴിയോട്ടില്ലത്തെ സുരേഷ് നമ്പൂതിരിയാണ് വാൾ എഴുന്നള്ളിച്ചത്. മുതിരേരിയിൽ നിന്നും 20 കിലോമീറ്ററോളം ദൂരം ഒറ്റയ്ക്ക് കാൽനടയായാണ് വാൾ എഴുന്നള്ളിച്ചത്. വാൾ ഇക്കരെ ശ്രീകോവിലിൽ പ്രവേശിച്ചതോടെ നെയ്യാട്ട വും ആരംഭിച്ചു.ഇതോടെ 28 ദിവസം നീണ്ടു നില്ക്കുന്ന വൈശാഖ മഹോത്സവത്തിന് തുടക്കമായി.