വിശ്വനാഥൻ യാത്രയായത് 8 വര്‍ഷം കാത്തിരുന്ന് കിട്ടിയ കുഞ്ഞിനെ ഒന്ന് താലോലിക്കാനാകാതെ ; ആത്മഹത്യയല്ലെന്ന് ഉറപ്പിച്ച് പറഞ്ഞ് കുടുംബം

കല്പറ്റ: കോഴിക്കോട് മെഡിക്കൽ കോളജിന് സമീപം ആദിവാസി യുവാവ് വിശ്വനാഥനെ തൂങ്ങി മരിച്ച നിലയിൽ കണ്ടെത്തിയ സംഭവം ആത്മഹത്യയല്ലെന്ന് ഉറപ്പിച്ച് പറഞ്ഞ് കുടുംബം. ”വിവാഹംകഴിഞ്ഞ് എട്ടുവര്‍ഷം കാത്തിരുന്ന് കിട്ടിയ കുഞ്ഞാണ്, പ്രസവിച്ചിട്ട് മൂന്നുദിവസമായിട്ടേയുള്ളൂ, അവന്‍ കുഞ്ഞിനെ ശരിക്കൊന്ന് കണ്ടിട്ടുപോലുമില്ല. വളരെ സന്തോഷവാനായിരുന്നു അവന്‍. അങ്ങനെയൊരാള്‍ ആത്മഹത്യചെയ്യില്ലെന്ന് ഉറപ്പാണ്. മരണത്തില്‍ ഞങ്ങള്‍ക്ക് സംശയമുണ്ട്. പോസ്റ്റ്മോര്‍ട്ടം നടപടികളില്‍പ്പോലും ദുരൂഹതയുണ്ടെന്ന് സഹോദരൻ ഗോപി പറഞ്ഞു.

വിശ്വനാഥൻ ആൾക്കൂട്ടമർദനത്തിന് ഇരയായതായി കുംടുംബം പറയുന്നു. ഇതിൽ കടുത്ത മാനസിക വിഷമത്തിലായിരുന്നു അദ്ദേഹം. എന്നാല്‍, മരണത്തില്‍ ദുരൂഹതയില്ലെന്നാണ് മെഡിക്കല്‍ കോളേജ് പോലീസ് പറയുന്നത്. ആരും വിശ്വനാഥനെ ദേഹോപദ്രവം ഏല്‍പ്പിച്ചിട്ടില്ല. ‘മോഷ്ടിക്കാന്‍വേണ്ടി നടക്കുന്ന ആളാണോ’യെന്ന് രോഗികള്‍ക്കൊപ്പം വന്നവരില്‍ ചിലര്‍ സംശയമുന്നയിച്ചിരുന്നെങ്കിലും ആരും മര്‍ദിച്ചിട്ടില്ല.

സി.സി.ടി.വി. ദൃശ്യങ്ങളില്‍ ആള്‍ക്കൂട്ടം ആക്രമിക്കുന്നതായി കണ്ടെത്തിയിട്ടില്ല. ബന്ധുക്കളും അങ്ങനെയൊരു പരാതി നല്‍കിയിട്ടില്ലെന്നും പോലീസ് പറഞ്ഞു. അതേസമയം യുവാവ് ജീവനൊടുക്കിയ സംഭവത്തില്‍ സംസ്ഥാന മനുഷ്യാവകാശ കമ്മിഷന്‍ സ്വമേധയാ കേസെടുത്തു.

മെഡിക്കല്‍ കോളേജ് പോലീസ് അസിസ്റ്റന്റ് കമ്മിഷണറും മെഡിക്കല്‍ കോളേജ് ആശുപത്രി സൂപ്രണ്ടും അന്വേഷണം നടത്തി ഒരാഴ്ചയ്ക്കകം റിപ്പോര്‍ട്ട് സമര്‍പ്പിക്കണമെന്ന് കമ്മിഷന്‍ ജുഡീഷ്യല്‍ അംഗം കെ. ബൈജുനാഥ് ആവശ്യപ്പെട്ടു.