ശങ്കു ഐ സി യുവില്‍ തന്നെ, നമുക്ക് പ്രാര്‍ത്ഥിക്കാം, കൃഷ്ണകുമാര്‍ പറയുന്നു

ബിജെബി പ്രവര്‍ത്തകനും അഭിഭാഷകനുമായ ശങ്കു ടി ദാസിന് അപകടമുണ്ടായ വിവരം ഇന്നലെയാണ് പലരും അറിയുന്നത്. ബൈക്ക് അപകടത്തില്‍ ഗുരുതരമായി പരുക്ക് പറ്റിയ അദ്ദേഹം ആശുപത്രിയില്‍ ചികിത്സയിലാണ്. ശങ്കു ടി ദാസിന്റെ അപകട വിവരം അറിഞ്ഞ് നടനും ബിജെപി നേതാവുമായ കൃഷ്ണകുമാര്‍ പങ്കുവെച്ച വാക്കുകള്‍ ശ്രദ്ധേയമാവുകയാണ്. അപകടത്തില്‍ അസ്വഭാവികതയൊന്നും ഇല്ലെന്നും ശങ്കു ഐസിയുവില്‍ തന്നെയാണ്, എന്നാലും അപകട നില തരണം ചെയ്തുവെന്നും കൃഷ്ണകുമാര്‍ പറയുന്നു. ഫേസ്ബുക്കില്‍ പങ്കുവെച്ച കുറിപ്പിലൂടെയാണ് കൃഷ്ണകുമാര്‍ ഇക്കാര്യം പറഞ്ഞത്.

കൃഷ്ണകുമാറിന്റെ കുറിപ്പ്, നമസ്‌കാരം സഹോദരങ്ങളേ.. ഒട്ടും സുഖകരമല്ലാത്ത ഒരു വാര്‍ത്തകേട്ടുകൊണ്ടാണ് ഇന്നത്തെ ദിവസം തുടങ്ങാനായത്. നമ്മുടെയെല്ലാം പ്രിയപ്പെട്ട ശ്രീ. ശങ്കു. ടി. ദാസിനെ, ഒരു ബൈക്കപകടത്തെ തുടര്‍ന്ന് ഗുരുതരാവസ്ഥയില്‍ ആസ്പത്രിയില്‍ പ്രവേശിപ്പിച്ചിരിക്കുന്നുവെന്നു കേട്ടപ്പോള്‍ ആദ്യത്തെ ഞെട്ടലിനു ശേഷം മനസ്സില്‍ വന്നത് ഇതിലെന്തെങ്കിലും അസ്വാഭാവികമായി നടന്നിട്ടുണ്ടോ എന്നതുതന്നെയായിരുന്നു. സംഘത്തോടൊപ്പം പ്രവര്‍ത്തിച്ചുപോന്ന ഒരുപിടി പ്രവര്‍ത്തകര്‍ (ഇപ്പോഴും തെളിയിക്കപ്പെടാത്ത) ദുരൂഹസാഹചര്യങ്ങളില്‍ റോഡപകടങ്ങളില്‍ പെടുകയോ മരണമടയുകയോ (അതോ കൊല്ലപ്പെടുകയോ ?) ചെയ്ത വാര്‍ത്തകള്‍ മനസ്സിലൂടെ കടന്നുപോയിയെന്നത് സത്യമാണ്.

ഏതായാലും ഇപ്പോഴത്തെ വിവരമനുസരിച്ച് ഇതില്‍ അസ്വാഭാവികമായൊന്നും ഇല്ലായെന്നുതന്നെയാണ് അറിയാന്‍ കഴിയുന്നത്. ശങ്കു ഐ സി യുവില്‍ തന്നെയാണ്, എന്നാലും അപകടനില തരണംചെയ്തുവരുന്നുവെന്നാണ് റിപ്പോര്‍ട്ടുകള്‍. എത്രയും പെട്ടന്നുതന്നെ അദ്ദേഹം സുഖം പ്രാപിക്കട്ടെയെന്നും, ചുറുചുറുക്കോടെ വീണ്ടും നമുക്കൊപ്പം പ്രവര്‍ത്തിച്ചുതുടരട്ടെയെന്നും നമുക്ക് പ്രാര്‍ത്ഥിക്കാം