നിന്റെ ജന്മം അനുഗ്രഹീതമായിരുന്നു,നിന്റെ ഓർമ ഞങ്ങൾക്കു നിധിയാണ്, ചിത്ര

പൊന്നോമന മകൾക്കു പിറന്നാളുമ്മകളുമായി ഗായിക കെ.എസ്.ചിത്ര. മകൾക്കൊപ്പമുള്ള ചിത്രം പങ്കുവച്ച് ഗായിക സമൂഹമാധ്യമങ്ങളിൽ കുറിച്ച വാക്കുകൾ ആരാധകരുടെയും കണ്ണു നനയിക്കുകയാണ്. ‘നിന്റെ ജന്മം അനുഗ്രഹീതമായിരുന്നു. നിന്റെ ഓർമ ഞങ്ങൾക്കു നിധിയാണ്. വാക്കുകൾക്കുമപ്പുറം നീ സ്നേഹിക്കപ്പെടുന്നു. നിന്നെ എത്രത്തോളം മിസ് ചെയ്യുന്നുണ്ടെന്നു പറയാൻ പറ്റുന്നില്ല. പിറന്നാളുമ്മകൾ നന്ദനാ’ എന്നാണ് കെ.എസ്.ചിത്ര സോഷ്യൽ മീഡിയയിൽ കുറിച്ചത്. സോഷ്യൽ മീഡിയ പോസ്റ്റ് ചുരുങ്ങിയ സമയത്തിനകം വൈറലായി. നിരവധി പേരാണു നന്ദനയ്ക്കു പ്രാർഥനയും ആശംസയും അറിയിച്ചത്.

മലയാളികളുടെ പ്രിയപ്പെട്ട ഗായികയായണ് കെ എസ് ചിത്ര. മലയാളികളുടെ മാത്രമല്ല ലോകത്തിലെ മുഴുവൻ സംഗീത പ്രേമികളുടെയും പ്രിയപ്പെട്ട ഗായികയാണ് ചിത്ര. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി, ബംഗാളി, ആസാമീസ്, തുളു തുടങ്ങിയ വിവിധ ഭാഷകളിൽ ചിത്ര ഗാനങ്ങൾ ആലപിച്ചിട്ടുണ്ട്. നിരവധി പുരസ്‌കാരങ്ങളും ഗായികയെ തേടിയെത്തിയിട്ടുണ്ട്. ദേശീയ പുരസ്‌കാരം കൂടാതെ വിവിധ സംസ്ഥാന സർക്കാരുകളുടെ പുരസ്‌കാരവും പല വട്ടം ചിത്രയെ തേടിയെത്തി. പത്മശ്രീയും ലഭിച്ചു. ചിത്രയുടെ ജീവിതത്തിലെ ഏറ്റവും വലിയ ദുംഖമാണ് കാത്തിരുന്ന് ലഭിച്ച മകളുടെ മരണം. മകളുടെ വിയോഗത്തിന്റെ ആഘാതത്തിൽ കഴിഞ്ഞ ചിത്ര ചെറിയൊരു ഇടവേളയ്ക്ക് ശേഷമാണ് വീണ്ടും റെക്കോഡിങ്ങിനെത്തിയത്.

2002ൽ ചിത്രയ്ക്കും ഭർത്താവ് വിജയ്ശങ്കറിനും നന്ദന ജനിക്കുന്നത്. 2011ൽ ഒരു വിഷു ദിനത്തിലാണ് നന്ദന ദുബായിയിൽ വച്ച്‌ നീന്തൽക്കുളത്തിൽ വീണ് മരിക്കുന്നത്. എട്ടു വയസ്സായിരുന്നു അന്ന് നന്ദനയ്ക്ക്.