കെഎസ്ആർടിസി ജീവനക്കാർക്ക് ആശ്വാസം; നാളെ മുതൽ ശമ്പള വിതരണം തുടങ്ങും

തിരുവനന്തപുരം: ശക്തമായ പ്രതിഷേധങ്ങൾ തുടരുന്നതിനിടെ കെഎസ്ആർടിസി ജീവനക്കാർക്ക് ആശ്വാസമായി നാളെ മുതൽ ശമ്പളം വിതരണം ചെയ്യും. കെഎസ്ആർടിസി മാനേജ്മെന്റ് ആണ് ഇക്കാര്യം അറിയിച്ചത്. ശമ്പള വിതരണത്തിനായി സർക്കാർ അനുവദിച്ചിട്ടുള്ള 30 കോടി രൂപ നാളെ കിട്ടുമെന്നാണ് മാനേജ്മെന്റ് അറിയിച്ചിരിക്കുന്നത്. ഇതിനുപുറമേ ബാക്കി തുക ഓവർ ഡ്രാഫ്റ്റ് എടുത്ത് ശമ്പളം നൽകാനാണ് ഇപ്പോൾ തീരുമാനിച്ചിരിക്കുന്നത്.

വിശേഷദിവസങ്ങളായ വിഷുവിനും ഈസ്റ്ററിനും ശമ്പളം ലഭിക്കാതിരുന്നതിനെത്തുടർന്ന് ജീവനക്കാർ കടുത്ത പ്രതിഷേധം ഉയർത്തിയിരുന്നു. സി.ഐ.ടി.യു. ആഭിമുഖ്യത്തിലുള്ള യൂണിയൻ, ചീഫ് ഓഫീസിന് മുന്നിൽ റിലേ നിരാഹാര സമരം തുടരുകയാണ്.ഈ മാസം 28ന് സൂചന പണിമുടക്ക് നടത്തുമെന്ന് സി.ഐ.ടി.യു, ബി.എം.എസ്. യൂണിയനുകൾ പ്രഖ്യാപിച്ചിട്ടുണ്ട്. ഐ.എൻ.ടി.യു.സിയുടെ ആഭിമുഖ്യത്തിലുള്ള ടി.ഡി.എഫ്. മെയ് 6ന് പണിമുടക്കും.