കൂമ്പാച്ചി മലയിൽ കുടുങ്ങിയ ബാബു അറസ്റ്റിൽ, വീട്ടിൽ അതിക്രമിച്ച് കയറിയെന്ന് പരാതി

പാലക്കാട് : വീട്ടിൽ അതിക്രമിച്ച് കയറി വീട്ടുകാരെ ഭീഷണിപ്പെടുത്തിയതിയ സംഭവത്തിൽ മലമ്പുഴ കൂമ്പാച്ചി മലയിൽ കുടുങ്ങിയ ബാബുവിനെ പോലീസ് അറസ്റ്റ് ചെയ്‌തു. ജനൽ ചില്ലുകൾ അടിച്ചു തകർത്തും ഗ്യാസ് സിലിണ്ടർ തുറന്നുവിട്ടുമാണ് യുവാവ് പരാക്രമം കാട്ടിയത്. സംഭവത്തിന് പിന്നാലെ പാലക്കാട് പോലീസ് സ്ഥലത്തെത്തി കസ്റ്റഡിയിലെടുക്കുകയായിരുന്നു.

വ്യാഴാഴ്ച വൈകുന്നേരം ആറ് മണിയോടെയായിരുന്നു സംഭവം. മരുത് റോഡ് ബസ്റ്റോപ്പിന് സമീപമുള്ള വീടിന്റെ മുറിയിൽ കയറിയാണ് ഇയാൾ അക്രമം കാണിച്ചത്. വീട്ടിലെ ഉപകരണങ്ങളെല്ലാം തല്ലിതകർത്ത ശേഷം ഗ്യാസ് സിലിണ്ടർ തുറന്നുവിട്ട് വീടിന് തീവയ്‌ക്കുമെന്നും ഇയാൾ ഭീഷണി മുഴക്കുകയായിരുന്നു.
ഏകദേശം ഒന്നര മണിക്കൂറോളം നീണ്ട പരിശ്രമത്തിനൊടുവിൽ വാതിൽ ചവിട്ടി തുറന്ന് ബാബുവിനെ കീഴ്പ്പെടുത്തിയത്.

ഗ്യാസ് സിലണ്ടർ തുറന്നുവിട്ടത് അപകട സാധ്യത വർദ്ധിപ്പിച്ചത് കാരണം പാലക്കാട് നിന്നും കൂടുതൽ ജീവനക്കാരെ എത്തിച്ചിരുന്നു. മയക്കുമരുന്ന് ഉപയോഗിച്ചതിനെ തുടർന്നുള്ള വിഭ്രാന്തിയാകും കാരണമെന്നാണ് ഉദ്യോഗസ്ഥരുടെ സംശയം. സംസ്ഥാനം കണ്ട ഏറ്റവും വലിയ രക്ഷാദൗത്യത്തിലൂടെ രക്ഷിച്ച 23-കാരനാണ് ബാബു. മൂന്ന് സുഹൃത്തുക്കളോടൊപ്പമാണ് ബാബു കുമ്പാച്ചി മല കയറാൻ എത്തിയത്.

ഒരു കിലോമീറ്റർ ഉയരമുള്ള ചെറാട് മല കയറി മുകളിലെത്തുകയായിരുന്നു ലക്ഷ്യം. എന്നാൽ കനത്ത വെയിൽ മൂലം ഒപ്പമുണ്ടായിരുന്ന സുഹൃത്തുക്കളില്ലാതെ ഒറ്റയ്‌ക്ക് മലകയറുകയായിരുന്നു. ഇതിനിടെയാനും മലയിൽ കുടുങ്ങിയത്.