ഞാന്‍ തന്നെ കണ്ണാടി നോക്കിയപ്പോള്‍ എനിക്ക് ബോറടിക്കാന്‍ തുടങ്ങി, അപ്പോള്‍ പ്രേക്ഷകരുടെ കാര്യം പറയേണ്ടതില്ലല്ലോ, കുഞ്ചാക്കോ ബോബന്‍ പറയുന്നു

മലയാളികളുടെ പ്രിയപ്പെട്ട നടനാണ് കുഞ്ചാക്കോ ബോബന്‍. അനിയത്തിപ്രാവ് എന്ന ചിത്രത്തിലൂടെയാണ് നടന്‍ തന്റെ അഭിനയ ജീവിതം ആരംഭിക്കുന്നത്. പിന്നീട് ഇടയ്ക്ക് വെച്ച് താരം മറ്റ് ബിസിനസുകളിലേക്ക് തിരിയുകയും അഭിനയ ജീവിതത്തില്‍ നിന്നും ഇടവേള എടുക്കുകയും ചെയ്തതിരുന്നു. എന്നാല്‍ മടങ്ങി എത്തിയപ്പോള്‍ താരത്തിന്റെ കൈ നിറയെ ചിത്രങ്ങളാണ്. മലയാളത്തിലെ റൊമാന്റിക് ഹീറോ ഇപ്പോഴും അദ്ദേഹം തന്നെയാണ്.

ഇപ്പോള്‍ പഴയകാലത്തെ തന്റെ സിനിമ കരിയറിനെ കുറിച്ചും മോശം ചിത്രങ്ങള്‍ ചെയ്ത സന്ദര്‍ഭത്തെ കുറിച്ചും ഒരു സ്വകാര്യ ചാനല്‍ അഭിമുഖത്തില്‍ തുറന്ന് സംസാരിച്ചിരിക്കുകയാണ് അദ്ദേഹം. അനിയത്തി പ്രാവിന് ശേഷം അത് പോലെയുള്ള ‘ചോക്ലേറ്റ്’ കഥാപാത്രങ്ങള്‍ മാത്രം ചെയ്തു പോരാന്‍ കാരണമായത് താന്‍ തന്നില്‍ പരീക്ഷണങ്ങള്‍ വരുത്താതിരുന്നത് കൊണ്ടാണെന്നും ഒരു മുടി പോലും കറുപ്പിക്കാതിരുന്ന തനിക്ക് സിനിമ ഇല്ലാതായി മാറിയതിനു കാരണം താന്‍ തന്നെയാണെന്നും കുഞ്ചാക്കോ ബോബന്‍ പറയുന്നു.

കുഞ്ചാക്കോ ബോബന്റെ വാക്കുകള്‍ ഇങ്ങനെ, ‘ചോക്ലേറ്റ് ഹീറോ കഥാപാത്രങ്ങള്‍ തുടരെ തുടരെ വരികയും ഞാന്‍ ചെയ്യുന്ന സിനിമകള്‍ മോശമാകുകയും എന്റെ കഥാപാത്രങ്ങള്‍ മോശമാകുകയും ചെയ്തതോടെ എനിക്ക് കൂടുതല്‍ മടുപ്പായി. ആ സമയത്ത് ഒരു മുടി പോലും കറുപ്പിക്കാന്‍ തയ്യാറാകാതിരുന്ന ഞാന്‍ എന്റെ ശരീരത്തില്‍ ഒരു മാറ്റവും വരുത്താന്‍ സമ്മതിച്ചിരുന്നില്ല. അതൊക്കെ എന്റെ കരിയറിനെ ബാധിച്ചിട്ടുണ്ട്. പിന്നീട് ഞാന്‍ തന്നെ കണ്ണാടി നോക്കിയപ്പോള്‍ എനിക്ക് ബോറടിക്കാന്‍ തുടങ്ങി. അപ്പോള്‍ പ്രേക്ഷകരുടെ കാര്യം പറയേണ്ടതില്ലല്ലോ. എനിക്ക് സിനിമയില്‍ വലിയ ഒരിടവേള വന്നതിനു കാരണം എന്നെ ആരും ഒതുക്കിയതോ എനിക്ക് ആരും പാര പണിഞ്ഞതോ ഒന്നുമല്ല. അതിനു കാരണക്കാരന്‍ ഞാന്‍ തന്നെയാണ്. തെരഞ്ഞെടുത്ത സിനിമകള്‍ ആണ് അതിന്റെ പ്രധാന കാരണം’.