ദാമ്പത്യ ജീവിതത്തില്‍ സമാധാനം വേണമെങ്കില്‍ ഈ നിയമം പാലിക്കണമെന്ന് കുഞ്ചാക്കോ ബോബന്‍

മലയാളികളുടെ പ്രിയപ്പെട്ട നടനാണ് കുഞ്ചാക്കോ ബോബന്‍. കുഞ്ചാക്കോ ബോബനും ഭാര്യ പ്രിയയ്ക്കും നാളുകള്‍ക്ക് ശേഷമാണ് കുഞ്ഞ് ജനിക്കുന്നത്. ഇപ്പോള്‍ കുഞ്ഞ് ഇസഹാക്കുമായുള്ള ഓരോ നിമിഷവും ആഘോഷമാക്കുകയാണ് ഇരുവരും. ലോക്ക്ഡൗണ്‍ കാലമായതോടെ വീട്ടില്‍ തന്നെയാണ് താരം. കുടുംബത്തിനൊപ്പം ആഘോഷിച്ചും ബാഡ്മിന്റണ്‍ കളിയും ഒക്കെയാണ് ലോക്ക്ഡൗണില്‍ താരത്തിന്റെ പരിപാടികള്‍.

ഇപ്പോള്‍ ദാമ്പത്യ ജീവിതത്തില്‍ സമാധാനം വേണമെങ്കില്‍ ഒരു നിയമം പാലിക്കണമെന്ന് പറയുകയാണ് കുഞ്ചാക്കോ ബോബന്‍. തലമുറകളായി കൈമാറി വരുന്ന സുവര്‍ണനിയമമാണിത്, പ്രിയയ്ക്ക് ഒപ്പമുള്ള സെല്‍ഫി പങ്കുവെച്ചുകൊണ്ട് ആ നിയമമെന്താണെന്ന് കുഞ്ചാക്കോ ബോബന്‍ വെളിപ്പെടുത്തി.

‘നിങ്ങള്‍ വരയ്ക്കുന്ന വരയ്ക്കപ്പുറം നിങ്ങളുടെ ഭാര്യ കടക്കാതിരിക്കട്ടെ. വര എവിടെ വരയ്ക്കണമെന്ന് അവള്‍ തീരുമാനിക്കട്ടെ’ എന്നാണ് കുഞ്ചാക്കോ ബോബന്‍ പങ്കുവെച്ച ആ സുവര്‍ണ നിയമം. ചിത്രത്തിന് കീഴെ രസകരമായ കമന്റുകളാണ് പ്രത്യക്ഷപ്പെടുന്നത്. മാത്രമല്ല വിവാഹ വാര്‍ഷിക ആശംസകളും പോസ്റ്റിന് താഴെ പലരും പങ്കുവെച്ചിട്ടുണ്ട്.

കുഞ്ചാക്കോ ബോബനും പ്രിയയും 2005ലാണ് വിവാഹിതര്‍ ആകുന്നത്. ഇരുവര്‍ക്കും 14 വര്‍ഷത്തെ കാത്തിരിപ്പിന് ഒടുവില്‍ ആണ് കുഞ്ഞ് പിറന്നത്. കുഞ്ഞിനൊപ്പമുള്ള ഓരോ നിമിഷവും ഇരുവരും ആഘോഷമാക്കുകയാണ്. കുഞ്ഞുമൊത്തുള്ള ചിത്രങ്ങളും വീഡിയോകളും സോഷ്യല്‍ മീഡിയകളിലൂടെ കുഞ്ചാക്കോ ബോബന്‍ പങ്കു വയ്ക്കാറുണ്ട്.