ഷുക്കൂര്‍ വധം; ഈ കേസ് ഞാന്‍ വിടുന്ന പ്രശ്നമില്ല, തനിക്കെതിരായ ആരോപണം തള്ളി പി.കെ.കുഞ്ഞാലിക്കുട്ടി

മലപ്പുറം : മുസ്ലിംലീഗ് പ്രവര്‍ത്തകന്‍ അരിയില്‍ ഷൂക്കൂര്‍ വധക്കേസില്‍ സിപിഎം നേതാവ് പി.ജയരാജനെ രക്ഷിക്കാന്‍ ഇടപെടല്‍ നടത്തിയെന്ന ആരോപണത്തില്‍ രൂക്ഷ പ്രതികരണവുമായി പി.കെ.കുഞ്ഞാലിക്കുട്ടി. പിന്നില്‍ പ്രവര്‍ത്തിച്ചവരെ കുറിച്ച് സൂചന ലഭിച്ചിട്ടുണ്ടെന്നും വെറുതെ വിടുന്ന പ്രശ്‌നമില്ലെന്നും അദ്ദേഹം പറഞ്ഞു.

ആരോപണത്തിനുപിന്നില്‍ എന്തോ ഉണ്ട്, വിഷയം പാര്‍ട്ടി ചര്‍ച്ച ചെയ്തു. ചില പേരുകളും ഊഹാപോഹങ്ങളും അന്തരീക്ഷത്തിലുണ്ട്. മൂന്നുനാല് പേരുകളുണ്ട്, സത്യമെന്തെന്ന് വഴിയെ അറിയട്ടെ. കെപിസിസി പ്രസിഡന്‍റിനെ ഇതിലേക്ക് വലിച്ചിഴയ്ക്കേണ്ടതില്ല. സുധാകരന്‍റെ പ്രതികരണത്തിലുണ്ടായ പ്രശ്നം അദ്ദേഹംതന്നെ വിശദീകരിച്ചു. ഈ കേസ് ഞാന്‍ വിടുന്ന പ്രശ്നമില്ല. നിയമപരമായി നേരിടുമെന്നും കുഞ്ഞാലിക്കുട്ടി പറഞ്ഞു.

‘ഇതെന്താ വെള്ളരിക്കാപ്പട്ടണമോ..മന്ത്രി വിളിച്ച് എസ്പിയോട് പറയുന്നു. എസ്പി ഡിവൈഎസ്പിയോടും, അദ്ദേഹമത് നാട്ടിലുള്ള ഒരു വക്കീലിനോടും പറഞ്ഞാല്‍ ഇതെല്ലാം വിശ്വസിക്കുകയല്ലേ നാട്ടിലുള്ള ആളുകള്‍. അതും അരിയില്‍ ഷുക്കൂര്‍ വധക്കേസിനെ കുറിച്ച് പറയുമ്പോള്‍.

അന്നത്തെ അന്വേഷണ ഉദ്യോഗസ്ഥന്‍ ചുമത്തിയ വകുപ്പുകള്‍ പോരെന്ന് കണ്ട് സുപ്രീംകോടതി വരെ പോയി സിബിഐ അന്വേഷണത്തിന് ഉത്തരവ് വാങ്ങിയ കേസാണിത്. ഞങ്ങള്‍ എത്രമാത്രം ഫൈറ്റ് നടത്തിയതാണ് ഈ കേസില്‍. അത്തരമൊരു കേസിനെ കുറിച്ചാണ് പറയുന്നത് എന്നെങ്കിലും തോന്നണ്ടെ. കേസ് നടത്തിയവര്‍ക്കൊക്കെ ഞാനതില്‍ വഹിച്ച പങ്ക് അറിയാം’ കുഞ്ഞാലിക്കുട്ടി പറഞ്ഞു.