യൂട്യൂബ് നോക്കി വീട്ടില്‍ പ്രസവം, യുവതിക്ക് ദാരുണാന്ത്യം, ഭർത്താവിനെ കസ്റ്റഡിയിലെടുത്തു

ചെന്നൈ: യൂട്യൂബിന്റെ സഹായത്തോടെ വീട്ടിൽ പ്രസവം നടത്താൻ ശ്രമിച്ച യുവതി മരിച്ചു. കൃഷ്ണഗിരി പുലിയാംപട്ടി സ്വദേശി മദേഷിന്റെ ഭാര്യ എം.ലോകനായകി (27)യാണ് പ്രസവത്തെത്തുടര്‍ന്നുണ്ടായ അമിതരക്തസ്രാവം കാരണം മരിച്ചത്. സംഭവത്തില്‍ ഭര്‍ത്താവ് മദേഷി(30)നെ പോലീസ് കസ്റ്റഡിയിലെടുത്തു. ഇവരുടെ കുഞ്ഞിനെ ആശുപത്രിയിൽ പ്രവേശിപ്പിച്ചു.

യുവതി ചൊവ്വാഴ്ച പുലര്‍ച്ചെയാണ് വീട്ടില്‍ പ്രസവിച്ചത്. യുവതിക്ക് പ്രസവവേദന അനുഭവപ്പെട്ടതോടെ ഭര്‍ത്താവ് മുന്‍കൈയെടുത്ത് വീട്ടില്‍ തന്നെ പ്രസവം നടത്തുകയായിരുന്നു. പ്രവാസശേഷം യുവതിക്ക് അമിത രക്തസ്രാവം ഉണ്ടായി. ഇതോടെ കുഞിനെയും അമ്മയെയും മദേഷ് സമീപത്തെ പ്രാഥമിക ആരോഗ്യകേന്ദ്രത്തില്‍ എത്തിച്ചു. അപ്പോഴേക്കും യുവതി മരണപ്പെട്ടിരുന്നു.

പോലീസ് നടത്തിയ അന്വേഷണത്തിൽ യൂട്യൂബ് നോക്കിയാണ് മദേഷ് വീട്ടില്‍ പ്രസവമെടുക്കുന്നരീതി മനസിലാക്കിയിരുന്നു. യുവതിയുടെ പ്രസവത്തിന് മുൻപ് തന്നെ ഇയാൾ നിരന്തരം ഇത്തരം വീഡിയോകൾ യൂട്യൂബ് വഴി കണ്ടിരുന്നു. വീട്ടില്‍ പ്രസവമെടുക്കുന്ന വീഡിയോകള്‍ ഇയാള്‍ യൂട്യൂബില്‍ നിരന്തരം കണ്ടിരുന്നതായി അയല്‍ക്കാരും മൊഴി നല്‍കി. പിന്നാലെ പോലീസ് ഇയാളെ കസ്റ്റഡിയിലെടുത്തു.

നിലവില്‍ അസ്വാഭാവിക മരണത്തിനാണ് കേസെടുത്തിരിക്കുന്നതെന്നും കുറ്റങ്ങള്‍ സ്ഥിരീകരിച്ചാല്‍ പ്രതിയുടെ അറസ്റ്റ് രേഖപ്പെടുത്തുമെന്നും പോലീസ് അറിയിച്ചു. ദമ്പതിമാരുടെ കുഞ്ഞ് പോച്ചാംപള്ളി സര്‍ക്കാര്‍ ആശുപത്രിയില്‍ ചികിത്സയില്‍ തുടരുകയാണ്. നിലവിൽ കുഞ്ഞിന് ആരോഗ്യപ്രശ്നനങ്ങൾ ഇല്ലെന്നാണ് വിവരം.