ക്ഷേത്രാചാരം മറികടന്ന് ശ്രീകോവിലേക്ക് അതിക്രമിച്ചു കയറി, രാജകുടുംബാംഗമായ വനിത അറസ്റ്റിൽ

പന്ന : ക്ഷേത്രാചാരം മറികടന്ന് ശ്രീകോവിലേക്ക് അതിക്രമിച്ചു കയറിയതിന് രാജകുടുംബാഗമായ വനിതയെ അറസ്റ്റ് ചെയ്തു. മധ്യപ്രദേശ് രാജകുടുംബാംഗമായ ജിതേശ്വരി ദേവിയാണ് അറസ്റ്റിലായത്. വെള്ളിയാഴ്ച ജന്മാഷ്ടമി ആഘോഷങ്ങൾക്കിടെ പന്ന ജില്ലയിലെ ബുന്ദേൽഖണ്ഡിലെ പ്രശസ്ത ക്ഷേത്രമായ ശ്രീ ജഗൽ കിഷോർ ക്ഷേത്രത്തിലായിരുന്നു സംഭവം. എല്ലാ വർഷവും ആചാരപ്രകാരം അർധരാത്രിയാണ് ക്ഷേത്രത്തിൽ ജന്മാഷ്ടമി ആഘോഷിക്കാറുള്ളത്.

എന്നാൽ ഇതിനിടെ ജിതേശ്വരി ക്ഷേത്രത്തിന്റെ ശ്രീകോവിലിലേക്ക് ആരതി ഉഴിയുന്നതിനായി കയറിയതാണ് പ്രശ്നങ്ങളുണ്ടാക്കിയത്. ഇതേതുടർന്നുണ്ടായ സംഘർഷത്തിൽ ഇവർ ശ്രീകോവിൽനിന്ന് തെന്നിവീഴുകയും ചെയ്തു. പൊലീസ് എത്തി ഇവരോട് ക്ഷേത്രപരിസരത്ത് നിന്നും പുറത്തുപോകണമെന്ന് ആവശ്യപ്പെട്ടു. എന്നാൽ ഇവർ അതിന് തയ്യാറായില്ല. പിന്നാലെ അറസ്റ്റ് ചെയ്യുകയായിരുന്നു.
ഇതിനിടെ ഇവർ മദ്യപിച്ചിരുന്നതായും ചിലർ ആരോപിച്ചു.

ജന്മാഷ്ടമി ദിവസം ക്ഷേത്രത്തിലെ ആചാരപ്രകാരം രാജകുടുംബത്തിലെ പുരുഷന്മാർ ‘‘ചാൻവാർ’’ എന്ന ചടങ്ങ് ചെയ്യേണ്ടിയിരുന്നതായി പന്ന സൂപ്രണ്ട് ഓഫ് പൊലീസ് സായി കൃഷ്ണ എസ് തോട്ട വിശദീകരിച്ചു. ഇതിനായി ഇവരുടെ മകന് എത്തിച്ചേരാൻ കഴിയാത്തതിനാലാണ്, സ്വയം ആചാരം ചെയ്യുന്നതിനായി ശ്രീകോവിലിലേക്ക് ഇവർ കയറിയത്. സംഭവത്തിൽ ഇവർക്കെതിരെ കേസ് റജിസ്റ്റർ ചെയ്തിട്ടുണ്ടെന്നും പൊലീസ് വിശദീകരിച്ചു. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായിരുന്നു.