അപ്രതീക്ഷിതമായ ഒരു വാര്‍ത്ത, പ്രാര്‍ത്ഥിക്കാന്‍ ആല്ലാതെ എന്ത് ചെയ്യാന്‍ സാധിക്കും

കവിയും ഗാനരചയിതാവുമായ അനില്‍ പനച്ചൂരാന്റെ വിയോഗം അപ്രതീക്ഷിതമായിരുന്നു. ഇപ്പോഴും കലാ കേരളത്തിന് ആ നഷ്ടം വിശ്വസിക്കാനായിട്ടില്ല. അപ്പോള്‍ അദ്ദേഹത്തിന്റെ നിര്യാണത്തില്‍ അനുശോചനം അറിയിച്ച് രംഗത്ത് എത്തിയിരിക്കുകയാണ് സംവിധായകന്‍ ലാല്‍ ജോസ്. വളരെ അപ്രതീക്ഷിതമായ ഒരു വാര്‍ത്തയാണ് ഇതെന്നും പ്രാര്‍ത്ഥിക്കാന്‍ ആല്ലാതെ എന്ത് ചെയ്യാന്‍ സാധിക്കുമെന്നും ഒരു മാധ്യമത്തോട് ലാല്‍ ജോസ് പ്രതികരിച്ചു.

ലാല്‍ ജോസിന്റെ വാക്കുകള്‍ ഇങ്ങനെ, ‘വളരെ അപ്രതീക്ഷിതമായ വാര്‍ത്തയാണ്. സിന്ധുരാജാണ് പനച്ചൂരാനെ ആദ്യമായി പരിചയപ്പെടുത്തിയത്. കുട്ടനാട്ടിലെ യാത്രക്കിടെ ‘വലയില്‍ വീണ കിളികളാണ് നാം’ എന്ന കവിത കേട്ട് അതെഴുതിയത് ആരെന്ന് അന്വേഷിച്ചപ്പോള്‍ സിന്ധുരാജ് പനച്ചൂരാനെ പരിചയപ്പെടുത്തുകയായിരുന്നു. പിന്നീട് എന്റെ അറബിക്കഥയില്‍ അദ്ദേഹം പാട്ടെഴുതി. ചോര വീണ മണ്ണി നിന്ന് എന്ന ഗാനം എഴുതി, പാടി, അഭിനയിച്ചു. പിന്നീട് കുറേ സിനിമകളില്‍ ഒപ്പം വര്‍ക്ക് ചെയ്തു. വെളിപാടിന്റെ പുസ്തകത്തില്‍ എന്റെമ്മേടെ ജിമിക്കി കമ്മല്‍ എന്ന ഗാനമെഴുതിയതും അദ്ദേഹമായിരുന്നു. ഒടുവില്‍ തട്ടിന്‍പുറത്ത് അച്യുതനില്‍ പാട്ട് എഴുതി പാടി അഭിനയിച്ചു. ബഹുമാനവും സ്‌നേഹവുമായിരുന്നു എന്നോറ്റ്. ദീര്‍ഘകാലത്തെ സൗഹൃദമുണ്ടായിരുന്നു.’

കോവിഡ് ബാധിച്ച് ചികിത്സയില്‍ കഴിയവെയാണ് അനില്‍ പനച്ചൂരാന്‍ മരണപ്പെട്ടത്. ഇന്നലെ രാത്രി 8.10 ഓടെ തിരുവനന്തപുരത്തെ സ്വകാര്യ ആശുപത്രിയില്‍ വെച്ചായിരുന്നു അന്ത്യം. കോവിഡ് ബാധിച്ച് മാവേലിക്കരയിലെ ഒരു സ്വകാര്യ ആശുപത്രിയില്‍ ചികിത്സയില്‍ ആയിരുന്നു അദ്ദേഹം. അവിടുത്തെ ചികിത്സ ഫലിക്കാതായതോടെ ഇന്നലെ രാവിലെ കരുനാഗപ്പള്ളിയിലേക്ക് മാറ്റി. അവിടെ നടത്തിയ ചികിത്സയും ഫലിക്കാതെ വന്നതോടെയാണ് തിരുവനന്തപുരത്തേക്ക് മാറ്റിയത്. കോവിഡ് ശ്വാസകോശത്തെ ബാധിച്ചതാണ് മരണ കാരണം. എട്ട് മണിയോടെ ഹൃദയാഘാതമുണ്ടായി.