ട്രെയിൻ ദുരന്ത ഭൂമിയിൽ നടന്നത് രാജ്യം കണ്ട ഏറ്റവും വലിയ രക്ഷാപ്രവർത്തനം

ന്യൂഡല്‍ഹി. രാജ്യത്തെ വലിയ ട്രെയിന്‍ അപകടങ്ങളിലൊന്നാണ് കഴിഞ്ഞ ദിവസം ബാലസോറില്‍ നടന്നത്. എന്നാല്‍ അപകടത്തില്‍ പരിക്ക് പറ്റിയവരെയും മരിച്ചവരെയും ട്രെയിനില്‍ നിന്നും പുറത്തെടുക്കാന്‍ കൈമെയ് മറന്നുള്ള രക്ഷാപ്രവര്‍ത്തനമാണ് നടന്നത്. പോലീസും നാട്ടുകാരും റെയില്‍വേ ഉദ്യോഗസ്ഥരും ആദ്യം രക്ഷ പ്രവര്‍ത്തനത്തിന് നേതൃത്വം നല്‍കി.

രക്ഷാ പ്രവര്‍ത്തനം ആരംഭിച്ചത് മുതല്‍ അപകടത്തില്‍ പെട്ടവരുടെ ജീവന്‍ രക്ഷിക്കുക മാത്രമായിരുന്നു ലക്ഷ്യം. സംഭവം നടക്കുമ്പോള്‍ ഇരുട്ടായതിനാല്‍ സ്ഥലത്തെത്തിയ ആളുകള്‍ കൈയ്യില്‍ കിട്ടിയതെല്ലാം ഉപയോഗിച്ച് രക്ഷാ പ്രവര്‍ത്തനത്തിന് നേതൃത്വം നല്‍കുകയായിരുന്നു. ആദ്യം തന്നെ ഗ്യാസ് കട്ടറുകളും ഇലക്ട്രിക് കട്ടറുകളും ഉപയോഗിച്ച് കോച്ചുകള്‍ പൊളിച്ച് ജീവന്‍ തേടുകയായിരുന്നു രക്ഷാ പ്രവര്‍ത്തകര്‍.

രാജ്യം കണ്ട വലിയ രക്ഷാ പ്രവര്‍ത്തനത്തിന് വിവിധ സര്‍ക്കാര്‍ ഏജന്‍സികള്‍ ദൗത്യത്തില്‍ ഉടനീളം പങ്കെടുത്തു. യുദ്ധകാല അടിസ്ഥാനത്തില്‍ നടന്ന രക്ഷാ പ്രവര്‍ത്തനത്തില്‍ ഇന്ത്യന്‍ സൈന്യവും പങ്കെടുത്തു. വ്യോമസേന ഹെലികോപ്റ്ററുകളും രക്ഷാ പ്രവര്‍ത്തനത്തിനായി എത്തി. ഗ്യാസ് കട്ടറുകളും ഇലക്ട്രിക് കട്ടറുകളും ഉപയോഗിച്ചാണ് രക്ഷാ പ്രവര്‍ത്തകര്‍ രാത്രി മുഴുവന്‍ രക്ഷാ പ്രവര്‍ത്തനം നടത്തിയത്.