സ്കൂളിലെത്താൻ അഞ്ച് മിനിട്ട് വൈകി ; 25 വിദ്യാർത്ഥികളെ പുറത്താക്കി ഗേറ്റ് പൂട്ടി അധികൃതർ

ആലപ്പുഴ: വിദ്യാർത്ഥികൾ സ്കൂളിലെത്താൻ അഞ്ച് മിനിട്ട് വൈകിയതിന് കുട്ടികളെ പുറത്താക്കി ഗേറ്റ് അടച്ച് മണിക്കൂറുകളോളം പുറത്തുനിർത്തി അധികൃതർ. ആലപ്പുഴ എടത്വ സെന്റ് അലോഷ്യസ് സ്കൂളിലാണ് സംഭവം. 25 വിദ്യാർത്ഥികളാണ് സ്കൂളിൽ കയറ്റാത്തത്തിനാൽ റോഡരികിൽ നിന്നത്. എന്നാൽ സ്ഥിരം വൈകിയെത്തുന്നവരെയാണ് പുറത്ത് നിർത്തിയതെന്നാണ് പ്രിൻസിപ്പൾ മാത്തുക്കുട്ടി വർഗീസ് പ്രതികരിച്ചു.

ഒമ്പത് മണിക്ക് മുൻപ് കുട്ടികൾ സ്‌കൂളിൽ എത്തേണ്ടതുണ്ട്. എന്നാൽ 9.10 വരെ എത്തിയ കുട്ടികളെ ക്ലാസിൽ കയറ്റിയിട്ടുണ്ട്. ക്ലാസിൽ കയറാതെ കറങ്ങി നടക്കുന്നവരെയാണ് പുറത്താക്കി ഗേറ്റടച്ചതെന്ന് പ്രിൻസിപ്പൽ പറയുന്നു. സംഭവം അറിഞ്ഞ കുട്ടികളുടെ രക്ഷിതാക്കൾ രംഗത്തെത്തിയതോടെയാണ് വിദ്യാർത്ഥികളെ സ്കൂളിൽ തിരികെ കയറ്റിയത്.