മത്സ്യത്തൊഴിലാളികള്‍ അപകടത്തില്‍പ്പെട്ട സംഭവം, മന്ത്രിമാര്‍ക്ക് നേരെ നാട്ടുകാരുടെ പ്രതിഷേധം

തിരുവനന്തപുരം. മത്സ്യബന്ധനത്തിന് പോയ ഒരു മത്സ്യത്തൊഴിലാളി മരിക്കുകയും മൂന്ന് പേരെ കാണാതാകുകയും ചെയ്ത സ്ഥലത്ത് എത്തിയ മന്ത്രിമാര്‍ക്ക് നേരെ നാട്ടുകാരുടെ പ്രതിഷേധം. സംഭവത്തില്‍ രക്ഷാപ്രവര്‍ത്തനം വൈകുന്നുവെന്ന് ആരോപിച്ചാണ് നാട്ടുകാര്‍ മന്ത്രിമാരെ തടഞ്ഞത്. മന്ത്രിമാരായ വി ശിവന്‍കുട്ടി, ജിആര്‍ അനില്‍, ആന്റണി രാജു എന്നിവര്‍ക്ക് നേരെയാണ് പ്രതിഷേധം ഉണ്ടായത്.

നാട്ടുകാര്‍ ശക്തമായ പ്രതിഷേധവുമായി എത്തിയതോടെ മന്ത്രിമാര്‍ സ്ഥലത്ത് നിന്നും മടങ്ങുകയായിരുന്നു. അതേസമയം മന്ത്രിമാര്‍ പ്രതിഷേധക്കാരോട് ഷോ വേണ്ടന്ന് പറഞ്ഞതായി നാട്ടുകാര്‍ പറയുന്നു. ഇതോടെ കൂടുതല്‍ പ്രതിഷേധം ശക്തമാകുകയായിരുന്നു. വര്‍ഷങ്ങളായി ഇവിടം അപകട മേഖലയാണെന്ന് നാട്ടുകാര്‍ പറയുന്നു. നിരന്തരം അപകടം ഉണ്ടാകുന്ന സ്ഥലമായിട്ടും അവശ്യത്തിന് സുരക്ഷ സംവിധാനമില്ലെന്നും നാട്ടുകാര്‍ ആരോപിക്കുന്നു.

വള്ളം മറിഞ്ഞപ്പോള്‍ തന്നെ ജില്ലാ ഭരണകൂടം നടപടികള്‍ സ്വീകരിച്ചു. തിരച്ചിലിന് വേണ്ട ക്രമീകരണം നടത്തി. ഹെലികോപ്റ്റര്‍ അടക്കം സൗകര്യം ഒരുക്കി. ജില്ലാ അദാലത്ത് വെട്ടിച്ചുരുക്കിയാണ് മന്ത്രിമാര്‍ സ്ഥലത്ത് എത്തിയതെന്നും നാട്ടുകാര്‍ക്ക് പറയനുള്ളത് എല്ലാം കേട്ടുവെന്നും വി ശിവന്‍കുട്ടി വാര്‍ത്താക്കുറിപ്പില്‍ പറയുന്നു. മരിച്ച മത്സ്യത്തൊഴിലാളി കുഞ്ഞുമോന്റെ വീട്ടിലെത്തി മന്ത്രിമാര്‍ ആദരാഞ്ജലി അര്‍പ്പിച്ചു.