ലോക്ക്ഡൗണ്‍ ജൂണ്‍ 30 വരെ നീട്ടി,​ ആരാധനാലയങ്ങളും മാളുകളും ജൂണ്‍ 8മുതല്‍ തുറക്കാം

രാജ്യത്തെ കോവിഡ് ഹോട്ട് സ്പോട്ടുകളില്‍ ലോക്ക്ഡൗണ്‍ ജൂണ്‍ 30 വരെ നീട്ടി കേന്ദ്രആഭ്യന്ത്ര മന്ത്രാലയം ഉത്തരവിറക്കി. അതേസമയം ഹോട്ട് സ്പോട്ടുകള്‍ ഒഴികെയുള്ള ഇടങ്ങളില്‍ ഘട്ടംഘട്ടമായി ഇളവുകള്‍ അനുവദിച്ചിട്ടുണ്ട്.ആരാധനാലയങ്ങള്‍ ജൂണ്‍ എട്ട്മുതല്‍ തുറക്കാന്‍ അനുമതി നല്‍കിയിട്ടുണ്ട്. ഷോപ്പിംഗ് മാളുകളും ,​ ഹോട്ടലുകളും വ്യവസായ കേന്ദ്രങ്ങളും ജൂണ്‍ എട്ട് മുതല്‍ തുറക്കാം. അതേസമയം രാത്രിയാത്രാനിയന്ത്രണം തുടരും. സംസ്ഥാനങ്ങളുമായി ആലോചിച്ച്‌ സ്കൂളുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ തുറക്കുനന്നതില്‍ തീരുമാനമെടുക്കും.

നാലാം ഘട്ട ലോക്ക്ഡൗണ്‍ ഇന്ന് അവസാനിക്കുന്ന സാഹചര്യത്തിലാണ് കേന്ദ ആഭ്യന്തര മന്ത്രാലയം അഞ്ചാം ഘട്ട ലോക്ക്ഡൗണിനുളള മാര്‍ഗനിര്‍ദേശങ്ങള്‍ പുറപ്പെടുവിച്ചിരിക്കുന്നത്. രണ്ടാഴ്ച വരെ ലോക്ക്ഡൗണ്‍ രാജ്യവ്യാപകമായി നീട്ടിയേക്കും എന്നായിരുന്നു സൂചനകള്‍. എന്നാല്‍ തീവ്രബാധിത മേഖലകളില്‍ ജൂണ്‍ 30 വരെ ലോക്ക്ഡൗണ്‍ നീട്ടാനാണ് കേന്ദ്ര സര്‍ക്കാര്‍ തീരുമാനിച്ചിരിക്കുന്നത്.

ഘട്ടംഘട്ടമായാണ് മറ്റിടങ്ങളിലെ ലോക്ക്ഡൗണ്‍ പിന്‍വലിക്കുക. ജൂണ്‍ 8 മുതലുളള ആദ്യഘട്ടത്തിലെ ഇളവുകളാണ് ഇപ്പോള്‍ പുറത്ത് വിട്ടിരിക്കുന്നത്. ആദ്യത്തെ ഒരാഴ്ച നിയന്ത്രണം നിലനില്‍ക്കും. തീവ്രബാധിത മേഖലകള്‍ ഏതൊക്കെയെന്ന് അതത് സംസ്ഥാനങ്ങള്‍ക്ക് തീരുമാനിക്കാവുന്നതാണ്.