ആഹാരം കഴിക്കില്ല, ചോദ്യങ്ങള്‍ക്ക് ഉത്തരവുമില്ല, കസ്റ്റഡിയില്‍ പുതിയ തന്ത്രവുമായി എം ശിവശങ്കര്‍

കൊച്ചി:മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിനെ അറസ്റ്റ് ചെയ്തതോടെ സര്‍ക്കാര്‍ പ്രതിരോധത്തില്‍ ആയിരിക്കുകയാണ്.വ്യക്തമായ തെളിവുകളുടെ അടിസ്ഥാനത്തിലാണ് ശിവശങ്കറിനെ ഇഡി കുടുക്കിയത്.രണ്ട് ദിവസം കസ്റ്റഡിയില്‍ കഴിഞ്ഞിട്ടും അന്വേഷണ സംഘത്തിന് മുന്നില്‍ ഒന്നും പറയാന്‍ ശിവശങ്കര്‍ തയ്യാറാകുന്നില്ല.ഇഡി ഉദ്യോഗസ്ഥര്‍ പലകുറി ചോദ്യങ്ങള്‍ ചോദിക്കുന്നുണ്ടെങ്കിലും മനസ് തുറക്കാന്‍ എം ശിവശങ്കര്‍ തയ്യാറായിട്ടില്ല.ശിവശങ്കര്‍ മനസ് തുറന്നാല്‍ പല ഉന്നതരും കുടുങ്ങുമെന്ന് കരുതുന്നവര്‍ അന്വേഷണസംഘത്തില്‍ തന്നെയുണ്ട്.

എം ശിവശങ്കറിന്റെ കസ്റ്റഡി രണ്ട് ദിവസം പിന്നിട്ടു.നവംബര്‍ അഞ്ച് വരെ കസ്റ്റഡി അനുവദിച്ചിട്ടുണ്ട്.എന്നാല്‍ രാവിലെ ഒമ്പത് മണി മുതല്‍ വൈകുന്നേരം ആറ് മണി വരെയുള്ള സമയത്ത് മാത്രമേ ശിവശങ്കറിനെ ചോദ്യം ചെയ്യാവൂ എന്ന് കോടതിയുടെ നിര്‍ദേശമുണ്ട്.തലങ്ങും വിലങ്ങുും പല തെളിവുകളും നിരത്തി പല വിധത്തില്‍ ചോദ്യം ചെയ്തിട്ടും ഒരക്ഷരം മിണ്ടാന്‍ ശിവശങ്കര്‍ തയ്യാറായിട്ടില്ല.ചോദ്യം ചെയ്യലില്‍ വിദഗ്ധരായവരെ ഒപ്പം കൂട്ടി കൂടുതല്‍ ഉദ്യോഗസ്ഥരുടെ സേവനം തേടാന്‍ ഒരുങ്ങുകയാണ് ഇഡിയുടെ കൊച്ചിയിലെ യൂണിറ്റ്.

കസ്റ്റഡിയില്‍ എടുത്ത ആദ്യ ദിവസം തന്നെ ഭക്ഷണം കഴിക്കാന്‍ ശിവശങ്കര്‍ തയ്യാറായില്ല.ഇത് അന്വേഷണ സംഘത്തെ സമ്മര്‍ദ്ദത്തില്‍ ആക്കുകയും ചെയ്തു.ഇന്നലെ ശാരീരിക അസ്വസ്ഥതകള്‍ പ്രകടിപ്പിച്ചതോടെ ഡോക്ടറെ വിളിച്ചു വരുത്തി ആരോഗ്യ നില പരിശോധിച്ചു.തുടര്‍ന്നും നിസ്സഹകരിച്ചാല്‍ കള്ളപ്പണം വെളുപ്പിക്കല്‍ നിരോധന നിയമത്തിലെ(പിഎംഎല്‍എ)അഞ്ചാം വകുപ്പു പ്രകാരം സ്വത്തു മരവിപ്പിക്കല്‍ നടപടിയിലേക്ക് അന്വേഷണ സംഘം നീങ്ങിയേക്കാം.ശിവശങ്കറിന്റെ ബെനാമി നിക്ഷേപമെന്നു സംശയിക്കുന്ന ഏതു സ്വത്തും അന്വേഷണം തീരുംവരെ മരവിപ്പിക്കാം.