എന്‍എസ്എസുമായി തര്‍ക്കത്തിനില്ല; ഇടതുപക്ഷത്തിന്റേതു വിശ്വാസസംരക്ഷണ നിലപാട്: എം.എ. ബേബി

ശബരിമല വിഷയത്തില്‍ എന്‍എസ്എസുമായി തര്‍ക്കത്തിനില്ലെന്നും എന്നാൽ ഏതു വിഷയത്തിലും ചർച്ചയാവാമെന്നും മുതിര്‍ന്ന സിപിഐഎം നേതാവ് എം.എ. ബേബി. വിശ്വാസം സംരക്ഷിക്കണമെന്ന നിലപാടാണ് ഇടതുപക്ഷ൦ സ്വീകരിച്ചിട്ടുള്ളത്. എന്‍എസ്എസ് പൊതുവില്‍ സമദൂര നിലപാടാണ് സ്വീകരിച്ചിട്ടുള്ളത്. ആ നിലപാട് ഉപേക്ഷിച്ച് ഏതെങ്കിലും മുന്നണിയെ പിന്താങ്ങും എന്ന് എന്‍എസ്എസ് ഇതുവരെ പറഞ്ഞിട്ടില്ല. അതുകൊണ്ട് തര്‍ക്കമില്ല. വിശ്വാസ സ്വാതന്ത്ര്യത്തെ സംരക്ഷിക്കാന്‍ ഇടത് മുന്നണി ഒരു വീഴ്ചയും വരുത്തിയില്ലെന്നും എം.എ. ബേബി പറഞ്ഞു.

ചില കാര്യങ്ങളില്‍ വിശ്വാസികളുടെ താത്പര്യങ്ങള്‍ വേണ്ടത്ര ചിലര്‍ കാത്തുസൂക്ഷിക്കുന്നില്ലെന്ന വിമര്‍ശനങ്ങള്‍ ശ്രദ്ധയിൽ പെട്ടിട്ടുണ്ട്. പക്ഷേ, വ്യക്തികളുടെ വിശ്വാസ സ്വാതന്ത്ര്യത്തെ സംരക്ഷിക്കുന്നതില്‍ ഇടത് മുന്നണി ഒരു വീഴ്ചയും വരുത്തിയിട്ടില്ലെന്നു യാതൊരു സങ്കോചവും കൂടാതെ പറയാന്‍ കഴിയുമെന്നും അദ്ദേഹം കൂട്ടിച്ചേർത്തു.