മധു വധക്കേസ്; കൂറുമാറിയ സാക്ഷിയെ വനംവകുപ്പില്‍ നിന്നും പിരിച്ചുവിട്ടു

മണ്ണാര്‍ക്കാട്. അട്ടപ്പാടി മധു വധക്കേസില്‍ കൂറ് മാറിയ സാക്ഷിയുടെ കാഴ്ച ശക്തി പരിശോധിക്കുന്നു. മണ്ണാര്‍ക്കാട് എസ്സിഎസ്ടി കോടതിയുടെ നിര്‍ദേശ പ്രകാരമാണ് പരിശോധന. കേസിലെ 29-ാം സാക്ഷിയായിരുന്ന സുനില്‍ കുമാറാണ് ബുധനാഴ്ച കോടതിയില്‍ കൂറ് മാറിയത്. മധുവിനെ കേസിലെ പ്രതികള്‍ കൊണ്ടുവരുന്ന ദൃശ്യങ്ങള്‍ കോടതിയില്‍ ബുധനാഴ്ച കാണിച്ചിരുന്നു.

എന്നാല്‍ ഈ ദൃശ്യങ്ങള്‍ കാണുവാന്‍ കഴിയുന്നില്ലെന്ന് സുനില്‍കുമാര്‍ കോടതിയെ അറിയിച്ചു. ഇതോടെയാണ് കാഴ്ചശക്തി പരിശോധിക്കുവാന്‍ കോടതി ഉത്തരവിട്ടത്. മധുവിലെ മര്‍ദ്ദിച്ച് കൊണ്ടുവരുന്നവരുടെ ദൃശ്യം ബുധനാഴ്ച കോടതിയില്‍ കാണിച്ചിരുന്നു. സംഭവത്തിന്റെ ദൃക്‌സാക്ഷിയായിരുന്നു സുനില്‍കുമാര്‍.

സുനില്‍കുമാറിനെ വിഡിയോയില്‍ കാണാമല്ലോ എന്ന ചോദ്യത്തിന് തനിക്കത് കാണുവാന്‍ കഴിയിന്നില്ലെന്നായിരുന്നു സുനില്‍കുമാര്‍ പറഞ്ഞത്. എന്നാല്‍ മുമ്പ് താന്‍ പ്രതികള്‍ ചേര്‍ന്ന് മധുവിനെ പിടിച്ചുകൊണ്ട് വരുന്നത് കണ്ടു. കള്ളന്‍ എന്ന് ആക്രോശിച്ചു കൊണ്ടാണ് പിടിച്ച് കൊണ്ടുവന്നത് എന്നായിരുന്നു സുനില്‍കുമാര്‍ നല്‍കിയ മൊഴി.

മധു വധ കേസില്‍ നിന്നും കൂറ് മാറിയ സുനില്‍കുമാറിനെ ഇതോടെ വനംവകുപ്പിലെ ജോലിയില്‍ നിന്നും പിരിച്ച് വിട്ടു. വനംവകുപ്പില്‍ സൈലന്റ് വാലി ഡിവിഷനിലെ താല്‍ക്കാലിക വാച്ചറായിരുന്നു സുനില്‍കുമാര്‍. ഇതോടെ മധു വധക്കേസില്‍ കൂറുമാറിയതിന് പിരിച്ച് വിട്ട വാച്ചര്‍മാരുടെ എണ്ണംനാലായി.