അനിയത്തിയും ഞാനും തമ്മില്‍ പതിനെട്ടര വയസ്സ് പ്രായ വ്യത്യാസമുണ്ട്, മഡോണ പറയുന്നു

മലയാളികളുടെ പ്രിയപ്പെട്ട നടിയാണ് മഡോണ് സെബാസ്റ്റ്യന്‍.പ്രേമം എന്ന ചിത്രത്തിലൂടെയാണ് മഡോണ് അഭിനയ രംഗത്ത് അരങ്ങേറ്റം കുറിക്കുന്നത്.തുടര്‍ന്ന് നിരവധി ചിത്രങ്ങളില്‍ നടി വേഷമിട്ടു.ഇപ്പോള്‍ തന്റെ മാതാപിതാക്കള്‍ തന്നെ വളര്‍ത്തിയ രീതിയെ കുറിച്ച് തുറന്ന് സംസാരിക്കുകയാണ് നടി.ഒരു മാഗസിന് അനുവദിച്ച അഭിമുഖത്തിലായിരുന്നു മഡോണ തന്റെ മനസ്സ് തുറന്നത്.

‘എന്തുകാര്യവും തുറന്നുസംസാരിക്കുന്ന വ്യക്തിയാണച്ഛന്‍.ഞാന്‍ വളരുമ്പോള്‍ തന്നെ ഈ ലോകം എത്ര വിശാലമാണെന്ന് അദ്ദേഹം കാണിച്ചു തന്നു.എല്ലാ കാര്യങ്ങളെയും വളരെ ലാഘവത്തോടെ സമീപിക്കാന്‍ പഠിപ്പിച്ചതും അച്ഛനാണ്.അമ്മയുടെ അടുത്ത് വേറൊരു തരം കെമസ്ട്രിയുണ്ട്.അമ്മ പറയുന്ന കാര്യങ്ങളൊക്കെ എനിക്ക് പെട്ടെന്ന് മനസിലാക്കാന്‍ പറ്റും.പ്രത്യേകിച്ച് മുതിര്‍ന്ന പെണ്‍കുട്ടിയായ ശേഷം.അച്ഛനും,അമ്മയും കാരണമാണ് ഞാന്‍ പാട്ടിലേക്ക് വന്നതു തന്നെ.അനിയത്തി മിഷേലും ഞാനും തമ്മില്‍ പതിനെട്ടര വയസ്സ് പ്രായ വ്യത്യാസമുണ്ട്.അച്ഛന്‍ പണ്ട് മുതലേ പറയും നിനക്ക് പതിനെട്ട് വയസ്സാകുമ്പോള്‍ നീ വീട് വിട്ട് മാറി താമസിക്കണമെന്ന്.ഇപ്പോള്‍ നാല് വര്‍ഷമായി ഞാന്‍ ഒറ്റയ്‌ക്കൊരു വീട്ടിലാണ് താമസം.ബാംഗ്ലൂര്‍ ക്രൈസ്റ്റ് കോളേജില്‍ നിന്ന് ബി കോം കഴിഞ്ഞ് നേരെ പാട്ടിന്റെ വഴിയിലേക്ക് ഇറങ്ങുകയായിരുന്നു.പിന്നീട് ഒരു വര്‍ഷം കഴിഞ്ഞപ്പോള്‍ തന്നെ വീടുമാറി.അവിടുന്ന് അരമണിക്കൂര്‍ ദൂരമുണ്ടാവും അച്ഛനും അമ്മയും താമസിക്കുന്നിടത്തേക്ക്’.- മഡോണ പറഞ്ഞു.

മലയാള സിനിമയില്‍ ഉണ്ടാകുന്ന പ്രശ്‌നങ്ങളിലും വിവാദങ്ങളിലും പൊതുവെ മഡോണ പ്രതികരിക്കാറില്ല.എന്തുകൊണ്ടാണ് താന്‍ മൗനം പാലിക്കുന്നതെന്ന് താരം തുറന്ന് പറഞ്ഞിരുന്നു.മഡോണയുടെ വാക്കുകളിങ്ങനെ,-ഇത്തരം പ്രശ്‌നങ്ങള്‍ ഞാനും ചിന്തിക്കാറുണ്ട്.നമുക്ക് ഒരുപാട് കാര്യങ്ങള്‍ പറയണമെന്നും ഇത് ഇങ്ങനെ ആള്‍ക്കാര്‍ക്ക് മനസിലായിരുന്നെങ്കില്‍ എന്നൊക്കെ ആലോചിക്കാറുണ്ട്.അതൊരുപക്ഷേ ഒരു പോസ്റ്റ് ഇട്ടതുകൊണ്ടോ വീഡിയോയില്‍ പറഞ്ഞതുകൊണ്ടോ ഒന്നും ആര്‍ക്കും മനസിലാവണമെന്നില്ല.അത് വലിയ റിസ്‌ക് ആണ്.ഈ പ്രശ്‌നങ്ങളെക്കുറിച്ച് പറയാന്‍ മാത്രം ഞാന്‍ ആളായിട്ടില്ല.അല്ലെങ്കില്‍ പറയാനുളള കൃത്യമായ സന്ദര്‍ഭം ഉണ്ടാവണം.അതില്ലെങ്കില്‍ പറയാതിരിക്കുന്നതല്ലേ നല്ലത്.അല്ലാതെ ഭയമുളളത് കൊണ്ടല്ല.

പാര്‍വതിയെ പോലുളളവര്‍ പ്രവര്‍ത്തിക്കുന്നതിന്റെ ഗുണങ്ങള്‍ നമുക്ക് കിട്ടുന്നുണ്ട്.അതുകൊണ്ട് അവരോടും നന്ദിയും ബഹുമാനവുമുണ്ട്.കൂടാതെ പുരുഷന്മാരുടെ പ്രശ്‌നങ്ങളെ ചെറുതാക്കി കാണിക്കേണ്ട കാര്യവുമില്ല.എന്നെ സംബന്ധിച്ച് കിട്ടുന്ന റോളുകള്‍ മാക്‌സിമം നന്നായി ചെയ്യണമെന്നേ ശ്രദ്ധിക്കാറുളളൂ.മറ്റ് കാര്യങ്ങളില്‍ ഫോക്കസ് ചെയ്താല്‍ അത് നെഗറ്റീവായി ബാധിക്കും.നമ്മളെല്ലാം സെന്‍സിറ്റീവ് ആള്‍ക്കാരല്ലേ പക്ഷേ ആര്‍ക്കെങ്കിലും ബുദ്ധിമുട്ട് ഉണ്ടെന്നറിഞ്ഞാല്‍ ഇടപെടുക തന്നെ ചെയ്യും.സ്റ്റേജ് ഷോകളില്‍ വരാത്തത് പേടി കൊണ്ടാണ്.സിനിമയില്‍ വന്നതിന് ശേഷം അതിനെക്കുറിച്ച് ബോധവതിയാണ്.കുറച്ച് കഴിയുമ്പോള്‍ മാറുമായിരിക്കും.ആള്‍ക്കൂട്ടത്തിന് ഇടയില്‍ ഇറങ്ങുന്നത് കംഫര്‍ട്ടബിളായിട്ടുളള കാര്യമല്ല.പറ്റുമെങ്കില്‍ ആരും ഇല്ലാത്ത ഇടത്ത് നില്‍ക്കുന്നതാ.