താലിബാൻ പിടിച്ചടക്കൽ തുടരുന്നു: അഫ്ഗാൻ ധനകാര്യമന്ത്രി രാജ്യം വിട്ടു

അഫ്ഗാനിൽ നിന്നും അമേരിക്ക പിൻവാങ്ങിയതോടെ താലിബാൻ ഭീകരർ കൂടുതൽ പ്രദേശങ്ങൾ പിടിച്ചടക്കുന്ന സാഹചര്യത്തിൽ ഉന്നത നേതാക്കൾ രാജ്യത്ത് നിന്നും പലായനം ചെയ്യുന്നതായി റിപ്പോർട്ട്. മന്ത്രി സ്ഥാനം രാജിവെച്ച ശേഷ൦ അഫ്ഗാൻ ധനമന്ത്രി ഖാലിദ് പയേന്ദയാണ് രാജ്യം വിട്ടത്. രാജ്യത്തെ സുരക്ഷാ സ്ഥിതി മോശമായ സാഹചര്യത്തിലാണ് ധനമന്ത്രി രാജ്യം വിട്ടത് എന്ന് ധനകാര്യമന്ത്രാലയം അറിയിച്ചു. കൂടുതൽ പ്രദേശങ്ങൾ പിടിച്ചടക്കുന്ന താലിബാൻ 90 ദിവസത്തിനുള്ളിൽ കാബൂൾ കീഴ്‌പ്പെടുത്തും എന്ന റിപ്പോർട്ടുകളും പുറത്തുവന്നിരുന്നു. നിലവിൽ അഫ്ഗാനിലെ പ്രമുഖ പ്രദേശങ്ങൾ താലിബാൻ ഭീകരർ പിടിച്ചടുക്കുകയാണ്.

അതേസമയം പ്രാദേശിക സായുധ സംഘങ്ങളെ ഉപയോഗിച്ച് താലിബാനെ നേരിടാൻ തന്ത്രം മെനയുന്ന അഫ്ഗാൻ പ്രസിഡന്റ് അഷറഫ് ഖാനി സൈനികർക്ക് ആവേശം പകരാൻ യുദ്ധമേഖലയിലെത്തിയിരിക്കുകയാണ്. താലിബാൻ ഭീകരരുടെ അടുത്ത ലക്ഷ്യമായ മസർ ഇ ഷെരീഫിലെത്തിയ പ്രസിഡന്റ് ഉന്നത നേതാക്കളുമായി യോഗം നടത്തി. മസർ ഇ ഷെരീഫിൽ സുരക്ഷ ശക്തമാക്കാനും താലിബാൻ ആക്രമണം പ്രതിരോധിക്കാനുള്ള നിർണായക നീക്കങ്ങൾ യോഗത്തിൽ ചർച്ചയായി എന്നാണ് വിവരം.