മഞ്ജുവിനെ ഒരുക്കുമ്പോള്‍ സങ്കടവും സന്തോഷവും കലര്‍ന്ന ഒരു മാനസികാവസ്ഥയായിരുന്നു; വിവാഹത്തിന് മഞ്ജുവിനെ ഒരുക്കിയ അനില പറയുന്നു

മലയാളികളുടെ പ്രിയപ്പെട്ട നടിയാണ് മഞ്ജു വാര്യര്‍. മലയാള സിനിമയിലെ ലേഡി സൂപ്പര്‍ സ്റ്റാര്‍ എന്നാണ് മഞ്ജുവിനെ വിശേഷിപ്പിക്കുന്നത്. ദീലീപും ആയുള്ള മഞ്ജുവിന്റെ വിവാഹവും വേര്‍പിരിയലും ഒക്കെ വലിയ വാര്‍ത്തയായിരുന്നു. ഇപ്പോള്‍ മഞ്ജു വാര്യരുടെ വിവാഹ ദിനത്തിലെ ചിത്രങ്ങളാണ് സോഷ്യല്‍ മീഡിയകളില്‍ പ്രചരിക്കുന്നത്. മഞ്ജുവിനെ വിവാഹ ദിനത്തില്‍ ഒരുക്കിയ മേക്കപ്പ് ആര്‍ട്ടിസ്റ്റ് ആയ അനില ജോസഫ് ആണ് ചിത്രങ്ങള്‍ പുറത്ത് വിട്ടിരിക്കുന്നത്. വര്‍ഷങ്ങളുടെ പഴക്കമുള്ള ചിത്രങ്ങള്‍ ആണെങ്കിലും ഇവയെല്ലാം തന്റെ ശേഖരണത്തില്‍ ഉള്ളതാണെന്നും അനില പറയുന്നു. മഞ്ജുവിനൊപ്പമുള്ള ചിത്രങ്ങള്‍ ഇന്‍സ്റ്റഗ്രാമില്‍ പങ്കുവെച്ച് കൊണ്ടാണ് അനില ഹൃദയസ്പര്‍ശിയായ കുറിപ്പ് പങ്കുവെച്ചിരിക്കുന്നത്.

അനില പങ്കുവെച്ച കുറിപ്പ് ഇങ്ങനെ;

‘മഞ്ജു വാര്യരെ ആദ്യമായി കണ്ടത് ഒരു ഫോട്ടോഷൂട്ടിന് വേണ്ടിയാണ് എനിക്കിപ്പോഴും അതോര്‍മ്മയുണ്ട്. എന്റെ സുഹൃത്തും കീരിടം ഉണ്ണിയുടെ ഭാര്യയുമായ സര്‍സിജയാണ് മഞ്ജുവിനെ ഒരുക്കാന്‍ എന്നെ വിളിച്ചത്. അന്ന് മുതല്‍ വിലമതിക്കുന്ന സൗഹൃദം ഞങ്ങള്‍ തമ്മില്‍ ആരംഭിച്ചു. അപൂര്‍വ്വം ആളുകളില്‍ ഒരാളാണ് മഞ്ജു. വളരെയധികം സത്യസന്ധതയും ആത്മാര്‍ഥതയും ഉള്ള ഒരു കുട്ടിയാണ്.

മഞ്ജുവിന് വേണ്ടി വിവാഹ വിരുന്നിന്റെ മേക്കപ്പ് ചെയ്ത ദിവസം എനിക്ക് ഒരിക്കലും മറക്കാന്‍ കഴിയില്ല. തിരുവനന്തപുരത്ത് ഒന്‍പത് വധുക്കളെ ഒരുക്കിയതിന് ശേഷമാണ് ഞാന്‍ മഞ്ജുവിനെ ഒരുക്കാന്‍ കൊച്ചിയിലെത്തിയത്. കൃത്യ സമയത്ത് തന്നെ മഞ്ജുവിനെ ഒരുക്കാന്‍ കഴിഞ്ഞു. സാധാരണയായി ഒരു വധുവിനെ ഒരുക്കി കഴിയുമ്പോള്‍ മനസ്സില്‍ എനിക്ക് വലിയ സന്തോഷം തോന്നും. പക്ഷേ മഞ്ജുവിനെ ഒരുക്കുമ്പോള്‍ സങ്കടവും സന്തോഷവും കലര്‍ന്ന ഒരു മാനസികാവസ്ഥയായിരുന്നു. കാരണം മലയാള സിനിമയ്ക്ക് നല്ലൊരു നടിയെ കൂടി നഷ്ടപ്പെടാന്‍ പോവുകയാണെന്ന് എന്ന് എനിക്കറിയാമായിരുന്നു. ഞാനുമായിട്ടുള്ള സൗഹൃദത്തിന് മഞ്ജുവിനോട് നന്ദി പറയുകയാണ്. നീ എനിക്ക് എന്നും പ്രത്യേകതയുള്ളവളായിരിക്കും.’