ഇരട്ടക്കുട്ടികള്‍ ജനിച്ച സന്തോഷത്തിന് പിന്നാലെ ബിഗ്ടിക്കറ്റ് നറുക്കെടുപ്പില്‍ കോടികളുടെ ഭാഗ്യം നേടി മലയാളി യുവാവ്

അബുദാബി: മലയാളിക്ക് കോടികളുടെ ഭാഗ്യം ഒരുക്കി വീണ്ടും അബുദാബി ബിഗ് ടിക്കറ്റ്. ബിജേഷ് ബോസ് എന്ന യുവാവിനെ തേടിയാണ് കോടികളുടെ ഭാഗ്യമെത്തിയത്. ഇരട്ടക്കുട്ടികളുടെ പിതാവായതിന് രണ്ട് ദിവസങ്ങള്‍ക്ക് ശേഷമാണ് ബിജേഷ് കോടീശ്വരനായത്. പ്രസവത്തിന് ശേഷം ഭാര്യയ്ക്ക് ഒപ്പം ആശുപത്രിയില്‍ നില്‍ക്കുന്നതിനിടെയാണ് ഈ സന്തോഷ വാര്‍ത്ത ബിജേഷിനെ തേടിയെത്തിയത്. ഉച്ചഭക്ഷണം വാങ്ങാന്‍ പുറത്ത് പോയ ബിജേഷ് ഭാര്യയക്ക് അടുത്തേക്ക് തിരികെ എത്തിയത് രണ്ട് കോടി ഇന്ത്യന്‍ രൂപ സമ്മാനം ലഭിച്ചെന്ന വാര്‍ത്തയോടെയാണ്.

ഷാര്‍ജയില്‍ താമസിക്കുന്ന ബിജേഷിന്റെ ഭാര്യ ഇരട്ടക്കുട്ടികള്‍ക്ക് ജന്മം നല്‍കിയതോടെ കുടുംബം സന്തോഷത്തിലായിരുന്നു. ഇതിനിടെയാണ് ഇരട്ടി മധുരമെന്നോണം ആ ഫോണ്‍ കോള്‍ ബിജേഷിനെ തേടിയെത്തിയത്. ബിഗ്ടിക്കറ്റ് പ്രതിനിധിയായ ബുഷ്‌റയാണ് ബിജേഷിനെ വിളിക്കുന്നത്. ബിഗ്ടിക്കറ്റ് പ്രതിവാര നറുക്കെടുപ്പില്‍ 10 ലക്ഷം ദിര്‍ഹം(രണ്ട് കോടി രൂപ) ലഭിച്ചുവെന്ന് അറിയിച്ചു.

‘വെറും രണ്ട് ദിവസങ്ങള്‍ക്ക് മുമ്പാണ് എന്റെ ഭാര്യ ഇരട്ടക്കുട്ടികള്‍ക്ക് ജന്മം നല്‍കിയത്. ഇന്ന് ഞാന്‍ മില്യന്‍ ദിര്‍ഹംസ് ബിഗ് ടിക്കറ്റിലൂടെ നേടിയിരിക്കുന്നു. എന്റെ രണ്ട് കുഞ്ഞുങ്ങള്‍ ജീവിതത്തിലേക്ക് ഭാഗ്യം കൊണ്ടുവന്നു. അതിനാലാണ് ഇന്ന് വിജയിക്കാനായത്’- ബിജേഷ് ബിഗ് ടിക്കറ്റ് പ്രതിനിധികളോട് പറഞ്ഞു.

ഇതുവരെ സമ്മാനത്തുക എന്തിന് വിനിയോഗിക്കണമെന്ന് തീരുമാനിച്ചിട്ടില്ല. ആദ്യം എനിക്കൊപ്പം ചേര്‍ന്ന് സമ്മാനാര്‍ഹമായ ഈ ടിക്കറ്റ് വാങ്ങിയ ചില സുഹൃത്തുക്കള്‍ക്കും സഹപ്രവവര്‍ത്തകര്‍ക്കും സമ്മാനത്തുക വീതിച്ച് നല്‍കും. ഇതിന്റെ സന്തോഷം കെട്ടടങ്ങിയ ശേഷം എന്തെങ്കിലും നല്ല കാര്യത്തിനായി പണം ഉപയോഗിക്കുന്നതിനായി പദ്ധതിയിടും.-ബിജേഷ് പറഞ്ഞു.