അയർലണ്ടിൽ പാലക്കാട് സ്വദേശിനി കുത്തേറ്റ് മരിച്ചു; ഭർത്താവ് കസ്റ്റഡിയിൽ

കോർക്ക്: അയർലണ്ടിൽ മലയാളി യുവതി കുത്തേറ്റ് മരിച്ചു. പാലക്കാട് സ്വദേശിനിയായ ദീപ (38) ആണ് കൊല്ലപ്പെട്ടത്. വിൽട്ടൺ കാർഡിനാൾ കോർട്ടിലെ വീട്ടിൽ വെള്ളിയാഴ്ച രാത്രിയായിരുന്നു കൊലപാതകം കോർക്ക് നഗരത്തിലെ വിൽട്ടണിലാണ് ദാരുണ സംഭവം. കാർഡിനാൾ കോർട്ടിലെ വീട്ടിൽ ഭാര്യാ ഭർത്താക്കന്മാർ തമ്മിലുണ്ടായ വാക്കേറ്റത്തെ തുടർന്നാണ് യുവതിയ്ക്ക് കുത്തേറ്റത്.

പാലക്കാട് സ്വദേശിനിയായ ഇവർ കോർക്കിൽ അക്കൗണ്ടന്റ് ആയി ജോലി ചെയ്യുകയായിരുന്നു. അപകട വിവരം അറിഞ്ഞ് രാത്രി പത്തോടെ അത്യാഹിത വിഭാഗങ്ങൾ സംഭവ സ്ഥലത്തെത്തിയിരുന്നെങ്കിലും മരണം സംഭവിച്ചിരുന്നു. ദമ്പതികൾക്ക് അഞ്ച് വയസുള്ള ഒരു മകനുണ്ട്. സംഭവസമയത്ത് കുട്ടി വീട്ടിലുണ്ടായിരുന്നില്ല. കുട്ടിയെ ഒരു കുടുംബ സുഹൃത്തിന്റെ വീട്ടിലേക്ക് മാറ്റി.

പരിശോധനകൾ പൂർത്തിയാക്കിയ മൃതദേഹം കോർക്ക് യൂണിവേഴ്‌സിറ്റി ഹോസ്പിറ്റലിലേക്ക് മാറ്റി. സംഭവവുമായി ബന്ധപ്പെട്ട് അറസ്റ്റിലായ നാൽപ്പത് വയസുകാരനായ ഭർത്താവിനെ കസ്റ്റഡിയിലെടുത്ത് ടോഗർ ഗാർഡ സ്റ്റേഷനിൽ ചോദ്യം ചെയ്യുകയാണ്.

ദീപ ഏകദേശം ഒരു വർഷം മുൻപാണ് അയർലൻഡിൽ എത്തിയത്. ഡിപെൻഡൻറ് വിസയിൽ നാല് മാസം മുന്നേയാണ് ഭർത്താവ് ഇവിടേക്കെത്തിയ ഇയാൾക്ക് ഇവിടെ ജോലി ലഭ്യമായില്ലെന്നാണ് വിവരം. ഇന്ത്യക്കാർ ഉൾപ്പടെ നിരവധി വിദേശീയർ താമസിക്കുന്ന പ്രദേശത്ത് നിന്നും ഇത്തരം ഒരു വാർത്ത കേൾക്കേണ്ടി വന്നത് സങ്കടകരമാണെന്ന് ഫിയാന ഫെയിൽ കൗൺസിലർ ഫെർഗൽ ഡെന്നിഹി പ്രതികരിച്ചു. കൊലപാതകം സംബന്ധിച്ച് എന്തെങ്കിലും വിവരങ്ങൾ ലഭിച്ചാൽ ടോഗർ ഗാർഡ സ്റ്റേഷൻറെ (021) 494 7120 എന്ന നമ്പറിലോ ഗാർഡ കോൺഫിഡൻഷ്യൽ ലൈനായ 1800 666 111 എന്ന നമ്പറിലോ ബന്ധപ്പെടാൻ അധികൃതർ അറിയിപ്പ് നൽകിയിട്ടുണ്ട്.