കോൺഗ്രസ് അദ്ധ്യക്ഷനായി ഖാർഗെ ഇന്ന് ചുമതലയേൽക്കും

കോൺഗ്രസ് അദ്ധ്യക്ഷനായി മല്ലികാർജുൻ ഖാർഗെ ഇന്ന് ചുമതലയേൽക്കും. രാവിലെ പത്തരക്ക് എഐസിസി ആസ്ഥാനത്ത് നടക്കുന്ന ചടങ്ങിൽ സോണിയ ഗാന്ധിയിൽ നിന്ന് ഖാർഗെ അദ്ധ്യക്ഷ സ്ഥാനം ഏറ്റെടുക്കും. പുതിയ അദ്ധ്യക്ഷൻ ചുമതലയേറ്റാൽ മൂന്ന് മാസത്തിനകം പ്ലീനറി സമ്മേളനം ചേർന്ന് പ്രവർത്തക സമിതി പുനഃസംഘടിപ്പിക്കണമെന്നാണ് വ്യവസ്ഥ.

കഴിഞ്ഞ 25 വർഷത്തിനിടെ പൂർണ്ണമായും നാമനിർദ്ദേശത്തിലൂടെയായിരുന്നു പുനസംഘടന. 1997-ൽ കൊൽക്കത്ത പ്ലീനറി സമ്മേളനത്തിലാണ് ഏറ്റവുമൊടുവിൽ തെരഞ്ഞെടുപ്പ് നടന്നത്. കോൺഗ്രസ് പ്രവർത്തക സമിതിയിലേക്ക് തെരഞ്ഞെടുപ്പ് നടക്കട്ടേയെന്നാണ് രാഹുൽ ഗാന്ധിയുടെ നിലപാട്. സമവായ നീക്കത്തിന് ഖാർഗെ ശ്രമം നടത്തുന്നതിനിടെയാണ് രാഹുൽ നിലപാട് വ്യക്തമാക്കിയത്.

ഇരുപത്തിയഞ്ചംഗ പ്രവർത്തക സമിതിയിൽ പാർട്ടി അധ്യക്ഷൻ ഖാർഗെയും, പാർലമെന്ററി പാർട്ടി നേതാവായി സോണിയ ഗാന്ധിയും ഉണ്ടാകും. 11 പേരെ നാമനിർദ്ദേശം ചെയ്യുകയും പന്ത്രണ്ട് പേർക്ക് മത്സരിക്കാനുമാകും. അദ്ധ്യക്ഷ തെരഞ്ഞെടുപ്പ് ഉൾപ്പാർട്ടി ജനാധിപത്യത്തിന്റെ തെളിവെന്ന് അവകാശപ്പെടുമ്പോൾ പ്രവർത്തക സമിതിയിലേക്ക് തെരഞ്ഞെടുപ്പ് പരമാവധി ഒഴിവാക്കാനാണ് ഖാർഗെ മുൻെൈകയ്യെടുക്കുന്നത്.നിയമസഭ തെരഞ്ഞെടുപ്പുകൾ നടക്കുമ്പോൾ പ്രവർത്തകസമിതിയിലേക്കുള്ള മത്സരം പാർട്ടിയിൽ പൊട്ടിത്തെറിയുണ്ടാക്കാനുള്ള സാധ്യത നേതൃത്വം വിലയിരുത്തുന്നുണ്ട്. നേതാക്കളുടെ അഭിപ്രായം ഖാർഗെ തേടുന്നതിനിടെയാണ് രാഹുൽ ഗാന്ധി നിലപാടറിയച്ചത്. അദ്ധ്യക്ഷ തെരഞ്ഞെടുപ്പ് പോലെ പ്രവർത്തക സമിതിയിലേക്കും തെരഞ്ഞെടുപ്പ് നടന്നാൽ എതിർക്കില്ലെന്ന് രാഹുൽ വ്യക്തമാക്കി.