മമത ബാനർജി ജനങ്ങളെ ഭിന്നിപ്പിച്ച് ഭരിക്കുന്നു, സ്ത്രീകൾക്ക് സുരക്ഷിതത്വം നൽകാൻ കഴിയാത്ത സർക്കാർ അധികാരത്തിൽ തുടരരുത്, രാജ്നാഥ് സിംഗ്

കൊൽക്കത്ത: സ്ത്രീകൾക്ക് സുരക്ഷിതത്വം നൽകാൻ കഴിയാത്ത സർക്കാർ അധികാരത്തിൽ തുടരരുത്. ബംഗാളിലെ തൃണമൂൽ കോൺഗ്രസ് സർക്കാരിനെതിരെ ആഞ്ഞടിച്ച് കേന്ദ്രപ്രതിരോധ മന്ത്രി രാജ്നാഥ് സിംഗ്. ബംഗാളിലെ ക്രമസമാധാന നില തകർന്നിരിക്കുകയാണ്.

ഏതൊരു സംസ്ഥാനത്തും വികസനം സാധ്യമാകണമെങ്കിൽ അവിടുത്തെ നിയമങ്ങളും സാഹചര്യങ്ങളും ശക്തിപ്പെടുക തന്നെ വേണം. എന്നാൽ ബംഗാളിൽ സ്ഥിതിഗതികൾ വ്യത്യസ്തമാണെന്നും കേന്ദ്രമന്ത്രി പറഞ്ഞു. ബംഗാളിൽ നടന്ന തെരഞ്ഞെടുപ്പ് യോഗത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

ബംഗാളിൽ എല്ലാവിഭാഗം ജനങ്ങളും അവഗണന നേരിട്ടുകൊണ്ടിരിക്കുകയാണ്. വരുന്ന നിയമസഭാ തെരഞ്ഞെടുപ്പ് തൃണമൂൽ കോൺഗ്രസിന്റെ അവസാനമാകും. ബിജെപി അധികാരത്തിലെത്തും. ഇക്കുറി ലോക്‌സഭാ തെരഞ്ഞെടുപ്പിൽ തൃണമൂൽ കോൺഗ്രസിനേയും, കോൺഗ്രസിനേയും, സിപിഎമ്മിനേയും ജനങ്ങൾ തുടച്ചുനീക്കണം.

രാജ്യത്തിന്റെ വികസനം, ജനങ്ങളുടെ ക്ഷേമം എന്നിവ ലക്ഷ്യമിട്ടാകണം രാഷ്‌ട്രീയം ചെയ്യേണ്ടത്. എന്നാൽ മമത ബാനർജിയുടെ ഭരണം അതിൽ നിന്ന് വ്യത്യസ്തമാണ്. ജനങ്ങളെ ഭിന്നിപ്പിച്ച് ഭരിക്കാനാണ് അവർ ശ്രമിക്കുന്നത്. തെറ്റിദ്ധാരണ പരത്തിക്കൊണ്ട് ആളുകളെ തമ്മിലടിപ്പിക്കാനാണ് അവരുടെ ശ്രമമെന്നും” രാജ്‌നാഥ് സിംഗ് വിമർശിച്ചു.