ഉത്സവത്തിന് കുടുംബത്തോടൊപ്പം എത്തിയ യുവാവിനെ തല്ലിച്ചതച്ച് പിണറായിയുടെ പോലീസ് ; തറയിലിട്ട് വലിച്ചിഴച്ച് എഎസ്ഐയുടെ നേതൃത്വത്തിലുള്ള സംഘം

തൃശൂർ : കൂടൽമാണിക്യം ഉത്സവത്തിന് കുടുംബ സമേതം എത്തിയ യുവാവിനെ എഎസ്ഐയുടെ നേതൃത്വത്തിലുള്ള സംഘം തല്ലിച്ചതച്ചതായി പരാതി. ഇരിങ്ങാലക്കുട, കാട്ടുങ്ങച്ചിറ എഎസ്ഐ തോമസിന്റെ നേതൃത്വത്തിലായിരുന്നു മർദ്ദനം. സഹോദരിമാരുടെ മുന്നിലിട്ടായിരുന്നു യുവാവിനെ ക്രൂരമായി ആക്രമിച്ചത്. ഇരിങ്ങാലക്കുട ഐക്കരക്കുന്ന് സ്വദേശി രാജീവിനാണ് മർദ്ദനമേറ്റത്. വ്യാഴാഴ്‌ച്ച രാത്രിയാണ് സംഭവം.

മർദനത്തിൽ ഗുരുതര പരുക്കുകളേറ്റ യുവാവ് ആശുപത്രിയിൽ ചികിത്സയിലാണ്. ഉത്സവത്തിനിടയിൽ കൂടെയുണ്ടായിരുന്ന സഹോദരിമാരെ ശല്യം ചെയ്ത യുവാക്കളെ രാജീവ് ചോദ്യം ചെയ്തു. വാക്കുതർക്കം ഉന്തും തള്ളുമായി. സ്ഥലത്ത് എത്തിയ പോലീസ് ശല്യം ചെയ്തവരെ പിടികൂടാതെ രാജീവിനെ മർദ്ദിക്കുകയായിരുന്നു.

ഇരിങ്ങാലക്കുട, കാട്ടുങ്ങച്ചിറ സ്റ്റേഷനിലെ എഎസ്ഐ തോമസിന്റെ നേതൃത്വത്തിലായിരുന്നു മർദ്ദനം. ലാത്തി കൊണ്ട് രാജീവിനെ പൊതിരെ തല്ലി. ലാത്തി ഒടിഞ്ഞിട്ടും തല്ല് നിർത്തിയില്ല. സഹോദരിമാർ മർദനം തടയാൻ ശ്രമിച്ചെങ്കിലും ഫലമുണ്ടായില്ല. ലാത്തി ഒടിഞ്ഞിട്ടും മർദനം തുടർന്നു. തറയിൽ വീണ യുവാവിനെ മണ്ണിലൂടെ വലിച്ചിഴച്ചു.

മർദ്ദനത്തിനിടെ രാജീവിന്റെ തലയ്‌ക്ക് ഗുരുതരമായി പരുക്കേറ്റു. രക്തം വാർന്നൊഴുകിയിട്ടും പോലീസ് വാഹനത്തിൽ ആശുപത്രിയിൽ എത്തിക്കാൻ തയ്യാറായില്ലെന്നും നാട്ടുകാർ പറഞ്ഞു. നിലവിൽ മർദ്ദനമേറ്റ രാജീവ്‌ തൃശൂരിലെ സ്വകാര്യ ഹോസ്പിറ്റലിൽ ചികിത്സയിലാണ്.