അജ്ഞാതനെ കൂട്ടം ചേർന്ന് മര്‍ദ്ദിച്ചു; സംഭവം ഗുരുവായൂര്‍ ക്ഷേത്രപരിസരത്ത്

ഗുരുവായൂര്‍: ഗുരുവായൂര്‍ ക്ഷേത്രപരിസരത്ത് അജ്ഞാതന് കൂര മർദ്ദനം. ഒരു കൂട്ടം ആളുകള്‍ ചേര്‍ന്ന് ഒരാളെ ക്രൂരമായി മര്‍ദ്ദിക്കുന്നതിന്റെ ദൃശ്യങ്ങള്‍ പുറത്തുവന്നു. കഴിഞ്ഞ ദിവസമായിരുന്നു സംഭവം. രാത്രി ക്ഷേത്ര നടയോട് ചേര്‍ന്ന സ്ഥലത്ത് തന്നെയാണ് സംഭവമുണ്ടായത്. മർദ്ദനത്തിനിരയായ ആളും മറ്റുള്ളവരും തമ്മില്‍ തര്‍ക്കമുണ്ടാകുകയും ഇയാള്‍ ഒരു വടി ഉപയോഗിച്ച് അടിക്കാന്‍ ശ്രമിക്കുന്നതും ദൃശ്യങ്ങളില്‍ കാണാൻ കഴിയും.

ഇത് വഴക്കിൽ കലാശിക്കുകയായിരുന്നു. തുടർന്ന് മറ്റുള്ളവര്‍ ഇയാളില്‍ നിന്ന് വടി പിടിച്ചുവാങ്ങി തിരിച്ചടിച്ചു. അസഭ്യം പറഞ്ഞാണ് ഇയാളെ എല്ലാവരും ചേര്‍ന്ന് മര്‍ദ്ദിക്കുന്നത്. “എന്നെ അടിക്കുമോടാ” എന്ന് ചോദിച്ച് നിലത്ത് വീണ ഇയാളെ ഒരു സ്ത്രീയും കൂടെയുള്ളവരും ചേര്‍ന്ന് അടിച്ചു.

ഗുരുവായൂര്‍ പോലീസ് പ്രാഥമിക അന്വേഷണം ആരംഭിച്ചു. ദൃശ്യങ്ങളുടെ അടിസ്ഥാനത്തില്‍ സംഭവത്തില്‍ ഉള്‍പ്പെട്ടവര്‍ ആരൊക്കെയെന്ന് പോലീസ് അന്വേഷിക്കുന്നുണ്ട്. സംഭവത്തിന്റെ പ്രകോപനമെന്താണെന്നും വ്യക്തമല്ല. ക്ഷേത്രജീവനക്കാര്‍ ഇതില്‍ ഉള്‍പ്പെട്ടിട്ടുണ്ടോയെന്നും പരിശോധിച്ചു വരുന്നുണ്ട്. ക്ഷേത്രത്തിലെ സുരക്ഷാ ജീവനക്കാര്‍ ഇതില്‍ ഇടപെട്ടിരുന്നില്ല.

കഴിഞ്ഞ ദിവസം ക്ഷേത്രത്തിൽ ഏകാദശി വിളക്ക് തുടങ്ങിയിരുന്നു. അടുത്ത മാസം മൂന്നിനാണ് ഗുരുവായൂര്‍ ഏകദശി. ഈ ദിവസങ്ങളിലെല്ലാം തന്നെ ഗുരുവായൂര്‍ ക്ഷേത്രത്തിലും ക്ഷേത്ര പരിസരത്തും രാത്രിയിലും വലിയ തിരക്കാണ് അനുഭവപ്പെടാറുള്ളത്. ഇവിടെ എത്തുന്നവർ ക്ഷേത്രപരിസരത്ത് താങ്ങുന്നതാണ് പതിവ്.