പട്ടിണി മൂലം പിടഞ്ഞ് മരണം, മുഖ്യമന്ത്രിക്ക് കത്തെഴുതിവയ്ച്ച് ജീവനൊടുക്കി

കോട്ടയം: കോവിഡ് വ്യാപനത്തെ തുടര്‍ന്ന് ലോക്ക്ഡൗണ്‍ നിലവില്‍ വന്നതോടെ പലര്‍ക്കും തങ്ങളുടെ ജോലി നഷ്ടപ്പെട്ടിരിക്കുകയാണ്. ഇത്തരത്തില്‍ ദാരിദ്ര്യത്തിലും പട്ടിണിയിലും ആയവരുമുണ്ട്. ഇത്തരത്തില്‍ ജോലിനഷ്ടപ്പെട്ട് സാമ്പത്തിക പ്രശ്‌നങ്ങളും പട്ടിണിയും സഹിക്കാനാവാതെ ഹോട്ടല്‍ ജീവനക്കാരന്‍ മുഖ്യമന്ത്രിക്ക് കത്ത് എഴുതി വെച്ച ശേഷം ജീവന്‍ ഒടുക്കി. കോട്ടയം കടുത്തുരുത്തി വെള്ളാശേരി കാശാംകാട്ടില്‍ രാജു ദേവസ്യ എന്ന 55 കാരനാണ് ജീവനൊടുക്കിയത്. തറവാട്ടില്‍ പോയി അമ്മയെ കണ്ട ശേഷം തൊട്ടടുത്ത മുറിയില്‍ കയറി രാജു തൂങ്ങി മരിക്കുകയായിരുന്നു.

14 വര്‍ഷമായി ഹോട്ടലില്‍ സപ്ലെയര്‍ ആയി ജോലി ചെയ്ത് വരികയായിരുന്നു രാജു. ലോക്ക്ഡൗണ്‍ കാരണം ജോലി പോയതോടെ വീട്ടുവാടക പോലും കൊടുക്കാന്‍ പറ്റാതായി. മക്കളുടെ സ്‌കൂള്‍ വിദ്യാഭ്യാസവും മുടങ്ങുമെവന്ന ഘട്ടമെത്തി. ഇതോടെയാണ് മനം നൊന്ത് ഇദ്ദേഹം ജീവനൊടുക്കാന്‍ തീരുമാനിച്ചതെന്ന് ബന്ധുക്കള്‍ പറയുന്നു.

”ഭാര്യയും മക്കളും മിക്ക ദിവസവും പട്ടിണിയിലാണ്. കുട്ടികളുടെ പഠന കാര്യം നോക്കാന്‍ പോലും കഴിയുന്നില്ല. വേറെ നിവൃത്തിയില്ലാതെയാണ് ജീവനൊടുക്കുന്നത്, ഒരു വീട് വയ്ക്കാന്‍ സഹായിക്കണം, കൈയൊഴിയരുത് ”. രാജുവിന്റെ പോക്കറ്റില്‍ നിന്നു കിട്ടിയ മുഖ്യമന്ത്രിക്കുള്ള കത്തില്‍ പറയുന്നു.

കടുത്തുരുത്തി കെ എസ് പുരം അലരിയില്‍ എട്ട് വര്‍ഷമായി രാജുവും ഭാര്യ ഷീലയും മക്കളായ എട്ടാം ക്ലാസ് വിദ്യാര്‍ത്ഥിനി എയ്ഞ്ചലും ഇമ്മാനുവലും വാടകയ്ക്ക് താമസിക്കുകയാണ്. നേരത്തെ ഷീലയുടെ സ്വര്‍ണം വിറ്റ് ഏഴ് സെന്റ് സ്ഥലം വാങ്ങിയിരുന്നു. വീടു വയ്ക്കാനായി പഞ്ചായത്തിന്റെ സഹായത്തിനായി ഓഫീസില്‍ അപേക്ഷ നല്‍കിയിട്ടും യാതൊരു പ്രതികരണവും ലഭിച്ചില്ല. വെള്ളാശേരിയിലെ തറവാട്ടില്‍ സഹോദരനും അമ്മയുമാണുള്ളത്. ഒരു വര്‍ഷമായി തളര്‍ന്ന് കിടക്കുന്ന അന്നമ്മ മാത്രമാണ് രാജു വീട്ടില്‍ എത്തിയ സമയം ഉണ്ടായിരുന്നത്. അനുജന്‍ സന്തോഷ് തിരികെ എത്തിയപ്പോഴാണ് രാജുവിനെ തൂങ്ങി മരിച്ച നിലയില്‍ കണ്ടെത്തിയത്.

മൃതദേഹം കോട്ടയം മെഡിക്കല്‍ കോളജ് ആശുപത്രിയിലേക്ക് മാറ്റി. സംസ്‌കാരം ഇന്ന് 2 ന് കടുത്തുരുത്തി സെന്റ് മേരീസ് ഫൊറോന (താഴത്തുപള്ളി) പള്ളിയില്‍.