ഭാര്യയെ കാണാനില്ലെന്ന് പോലീസിൽ പരാതി നൽകി, വിവാഹമോചനത്തിന് സമ്മതിച്ച ഇരുവരും പിരിഞ്ഞു, പിന്നാലെ പോയി കഴുത്തറുത്ത് യുവാവ്

പത്തനാപുരം: ഒത്തുതീർപ്പ് ചർച്ചകൾക്കുശേഷം മടങ്ങുകയായിരുന്ന യുവതിയെ ഭർത്താവ് പിന്തുടർന്നെത്തി നടുറോഡിൽവെച്ച് കഴുത്തറത്തു. ഗുരുതരമായി പരിക്കേറ്റ പത്തനാപുരം കടശ്ശേരി രേവതിവിലാസത്തിൽ രേവതി(24)യെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. തിരക്കേറിയ പത്തനാപുരം-കുന്നിക്കോട് റോഡിൽ മൗണ്ട് താബോർ കുരിശ്ശടിക്ക് എതിർവശം ആൾക്കാർ നോക്കിനിൽക്കെയാണ് യുവതിയെ ഭർത്താവ് കഴുത്തറുത്ത് കൊലപ്പെടുത്താൻ ശ്രമിച്ചത്. സംഭവത്തിൽ മലപ്പുറം അനന്താവൂർ ബാവപ്പടി, നൈനിക്കാട്ടിൽവീട്ടിൽ ഗണേഷ് (30) നാട്ടുകാർ കെട്ടിയിട്ട് പോലീസിൽ ഏൽപ്പിച്ചു. ചൊവ്വാഴ്ച ഒന്നരയോടെയായിരുന്നു സംഭവം.

ഇരുവരും ഒൻപതുമാസം മുമ്പായിരുന്നു വിവാഹം കഴിച്ചത്. എന്നാൽ ഏറെനാളായി ഇരുവരും പിരിഞ്ഞു താമസിക്കുകയായിരുന്നു. പിന്നലെ ഗണേഷ് പത്തനാപുരം പോലീസ് സ്റ്റേഷനിൽ ഭാര്യയെ കാണാനില്ലെന്നുകാട്ടി പരാതി നൽകി. ഇതേത്തുടർന്ന് ഇരുവരെയും ചൊവ്വാഴ്ച സ്റ്റേഷനിലേക്ക് വിളിപ്പിച്ചു. എന്നാൽ യുവാവിനെ വേണ്ടെന്ന് യുവതി ഉറപ്പിച്ചു പറഞ്ഞു. ഉഭയകക്ഷി സമ്മതപ്രകാരം വിവാഹമോചനത്തിന് ഇരുവരും സമ്മതിച്ച ശേഷം മടങ്ങി.

പിന്നാലെ കൂടിയ ഭർത്താവ് പഞ്ചായത്ത് ഓഫീസ് ജങ്ഷനിൽനിന്നു കെ.എസ്.ആർ.ടി.സി. ബസ് സ്റ്റാൻഡ് ഭാഗത്തേക്ക് നടന്നുപോകുകയായിരുന്ന യുവതിയെ കത്തി ഉപയോഗിച്ച് കഴുത്തിൽ കുത്തി. റോഡിൽ വീണപ്പോൾ കത്തി ഉപയോഗിച്ച് കഴുത്തറത്തു. നാട്ടുകാർ ഓടികൂടുകയും ഗണേഷിനെ പിടിച്ചു മാറ്റുകയും ചെയ്തു. യുവതിയോയെ ഉടൻതന്നെ ആശുപത്രിയിൽ എത്തിക്കുകയും ചെയ്തു. തിരുവനന്തപുരം മെഡിക്കൽ കോളേജ് ആശുപത്രിയിലാണ് യുവതി ഇപ്പോൾ ഉള്ളത്. മന്ത്രി കെ.എൻ.ബാലഗോപാൽ യുവതിയെകാണാൻ എത്തിയിരുന്നു. ചികിത്സ ഉറപ്പാക്കുമെന്ന് വാക്ക് നൽകുകയും ചെയ്തു.