പ്രതിക്ക് തെറ്റ് മനസിലായിട്ടുണ്ട്, മുഖത്ത് മൂത്രമൊഴിച്ച സംഭവത്തിൽ പ്രതിയെ വിട്ടയക്കണമെന്ന് ഇരയായ ആദിവാസി യുവാവ്

ഭോപ്പാൽ : ആദിവാസി യുവാവിന്റെ മുഖത്ത് മൂത്രമൊഴിച്ച സംഭവത്തിൽ പ്രതിയെ വെറുതെ വിടണമെന്ന്
ആവശ്യപ്പെട്ട് ഇര. പ്രതിയായ പ്രവേശ് ശുക്ലയ്ക്ക് താൻ ചെയ്ത തെറ്റ് മനസിലാക്കിയെന്നും അതിനാൽ ഇനിയും അയാളെ ശിക്ഷിക്കണ്ടെന്നും ഇരയായ ആദിവാസി യുവാവ് ദഷ്‌‌മത് റാവത്ത് പ്രതികരിച്ചു.

ആദിവാസി യുവാവിന്റെ മുഖത്ത് മൂത്രമൊഴിച്ച സംഭവത്തിൽ കഴിഞ്ഞ ബുധനാഴ്ചയാണ് പ്രവേശ് ശുക്ലയെ പൊലീസ് അറസ്റ്റ് ചെയ്തത്. പ്രതിയുടെ ക്രൂരതയുടെ വീഡിയോ ചൊവ്വാഴ്ചയാണ് സോഷ്യൽ മീഡിയയിൽ വെെറലായത്. പിന്നാലെ ജനരോക്ഷം ഉയരുകയും പ്രതിയെ ഉടനടി പോലീസ് പിടികൂടുകയുമായിരുന്നു.

പ്രതിക്ക് ബി.ജെ.പി നേതാക്കളുമായി ബന്ധമുണ്ടെന്ന് പ്രതിപക്ഷം ആരോപിക്കുകയുണ്ടായി. ഇതിന് പിന്നാലെ ഭോപ്പാലിൽ മുഖ്യമന്ത്രി ശിവരാജ് സിംഗ് ചൗഹാൻ ഇരയായ ആദിവാസി യുവാവിന്റെ കാൽകഴുകി ക്ഷമ ചോദിച്ചതും വലിയ രീതിയിൽ ശ്രദ്ധിക്കപ്പെട്ടിരുന്നു.

പ്രതിക്കെതിരെ ഐ.പി.സി 294, 504 അടക്കമുള്ള വകുപ്പുകൾ ചുമത്തിയാണ് കേസെടുത്തത്. അനധികൃത നിർമ്മാണം കണ്ടെത്തിയതോടെ ഇയാളുടെ വീടിന്റെ ഒരു ഭാഗം സർക്കാർ ഇടിച്ചു നിരത്തുകയും ചെയ്തു. യുവാവ് നേരിട്ട അനുഭവം തന്നെ വേദനിപ്പിച്ചെന്ന് അന്ന് മുഖ്യമന്ത്രി പറഞ്ഞിരുന്നു.

മുഖ്യമന്ത്രിയുടെ ഔദ്യോഗിക വസതിയിൽ യുവാവിനെ കസേരയിലിരുത്തി താഴെയിരുന്നാണ് ശിവരാജ് സിംഗ് ചൗഹാൻ കാൽ കഴുകിയത്. കൂടാതെ നെറ്റിയിൽ തിലകം ചാർത്തി മാല അണിയിക്കുകയും, ഉപഹാരങ്ങൾ നൽകുകയും ചെയ്തിരുന്നു.