മാണ്ഡ്യ സിറ്റിം​ഗ് എംപി ബിജെപിയിൽ ചേർന്നു

മാണ്ഡ്യ എംപിയും നടിയുമായ സുമലത അംബരീഷ് ബിജെപിയിൽ ചേർന്നു. മുതിർന്ന ബിജെപി നേതാവ് ബിഎസ് യെദ്യൂരപ്പ, സംസ്ഥാന അദ്ധ്യക്ഷൻ ബി.വൈ വിജയേന്ദ്ര, പ്രതിപക്ഷ നേതാവ് ആർ അശോക, കർണാടക തിരഞ്ഞെടുപ്പിന്റെ ചുമതലയുള്ള ദേശീയ ജനറൽ സെക്രട്ടറി രാധാ മോഹൻ ദാസ് അഗർവാൾ, മുൻ മുഖ്യമന്ത്രി ഡിവി സദാനന്ദ ഗൗഡ എന്നിവരുടെ സാന്നിധ്യത്തിലാണ് അം​ഗത്വം സ്വീകരിച്ചത്.

ഭർത്താവ് അംബരീഷിന്റെ വിയോ​ഗത്തിന് പിന്നാലെ 2019-ലാണ് മാണ്ഡ്യ മണ്ഡലത്തിൽ നിന്ന് സുമലത മത്സരത്തിനിറങ്ങിയത്. പ്രശസ്ത ചലച്ചിത്ര താരവും കോൺ​ഗ്രസ് സർക്കാരുകളിൽ എംപിയുമായിരുന്നു അംബരീഷ്.

അംബരീഷിന്റെ കുത്തകയായിരുന്ന മണ്ഡലത്തിൽ സ്വതന്ത്ര സ്ഥാനാർത്ഥി ആയാണ് കളത്തിലിറങ്ങി വിജയം കൊയ്തത്. ബിജെപി പിന്തുണയോടെ അന്നത്തെ മുഖ്യമന്ത്രി കുമാരസ്വാമിയുടെ മകൻ നിഖിലിനെ 1,25,876 വോട്ടുകൾക്കായിരുന്നു പരാജയപ്പെടുത്തിയത്.