ഞാനടക്കമുള്ളവർക്ക് പ്രചോദനമായിരുന്നു നിങ്ങൾ, കണ്ണീർ പ്രണാമവുമായി മഞ്ജു

അർബുദ രോഗബാധിതനായി മരണപ്പെട്ട നന്ദു മഹാദേവക്ക് ആദരാഞ്ജലി അർപ്പിച്ച്‌ നിരവധിപ്പേരാണ് എത്തിയത്. അനേകർക്ക് പ്രചോദനമായിരുന്ന നന്ദുവിന് കണ്ണീർ പ്രണാമവുമായി മഞ്ജുവാര്യരുമെത്തി. ‘സമാധാനത്തോടെ വിശ്രമിക്കുക നന്ദു! കേരള ക്യാൻ കാമ്പെ യ്‌നുകൾക്കിടയിൽ നിങ്ങളോടൊപ്പം സമയം ചെലവഴിക്കാൻ കഴിഞ്ഞത് എന്റെ ഭാഗ്യമാണ്. ഞാനടക്കം പലരെയും പ്രചോദിപ്പിച്ചതിന് നന്ദിയെന്നാണ് മഞ്ജു കുറിച്ചത്

‘അതിജീവനത്തിന്റെ രാജകുമാരന് പ്രണാമം. കാൻസർ എന്ന രോഗത്തിനെ തന്റെ ചിരിയിലൂടെ തോൽപ്പിച്ച നന്ദു ഒടുവിൽ വിടവാങ്ങി’- ഉണ്ണി മുകുന്ദൻ തന്റെ ഫേസ്ബുക്കിൽ കുറിച്ചു.

കോഴിക്കോട് എം.വി.ആർ കാൻസർ സെൻററിൽ ഇന്ന് പുലർച്ചെ മൂന്നരയോടെയായിരുന്നു നന്ദുവിന്റെ മരണം. തിരുവനന്തപുരം ഭരതന്നൂർ സ്വദേശിയാണ് നന്ദു. ക്യാൻസർ ബാധിതനായെങ്കിലും രോഗത്തോടുള്ള പോരാട്ടമാണ് നന്ദുവിനെ എല്ലാവർക്കും പരിചിതനാക്കിയത്. സോഷ്യൽ മീഡിയയിലൂടെ സമാന അനുഭവത്തിലൂടെ കടന്നുപോകുന്നവർക്ക് വലിയ ധൈര്യമാണ് നന്ദു നൽകിയിരുന്നത്. അതുകൊണ്ട് തന്നെ സമൂഹമാധ്യമങ്ങളിൽ ഒരുപാട് ഫോളോവേഴ്‌സ് കൂടിയുള്ള വ്യക്തിയായിരുന്നു നന്ദു മഹാദേവ. ‌‌‌ രോഗത്തെ ചിരിയോടെ നേരിട്ട് ക്യാൻസറിനെതിരായ പോരാട്ടത്തിൽ നിരവധി പേർക്ക് പ്രചോദനമായാണ് നന്ദുവിന്റെ മടക്കം. ജീവിതത്തിന്റെ ഓരോ ഘട്ടവും നന്ദു സോഷ്യൽ മീഡിയയിലൂടെ അറിയിച്ചിരുന്നു. അവസാന ദിവസങ്ങളിൽ നന്ദുവിന്റെ ശ്വാസകോശത്തെയും ക്യാൻസർ ബാധിച്ചിരുന്നു.
‌