നിറഞ്ഞ സന്തോഷത്തോടെ കാവ്യയോട് ചേർന്ന് ഇരുന്ന് മീനാക്ഷി, പിറന്നാൾ ചിത്രം വൈറൽ

മലയാളികളുടെ പ്രിയ താരം കാവ്യ മാധവന്റെ ജന്മദിനമായിരുന്നു കഴിഞ്ഞ ദിവസം. നിരവധി ആളുകളാണ് ആശംസയുമായെത്തുന്നത്. പിറന്നാൾ ദിനത്തിൽ കാവ്യയ്ക്ക് ആശംസകളുമായി മീനാക്ഷിയും എത്തി.

കാവ്യയ്ക്ക് ഒപ്പം ചേർന്നിരിയ്ക്കുന്ന ഒരു ഫോട്ടോയാണ് മീനാക്ഷി പങ്കുവച്ചത്. നിറഞ്ഞ സന്തോഷത്തോടെ മീനൂട്ടിയെ കാവ്യ ചേർത്ത് പിടിച്ചിരിയ്ക്കുന്നതും ചിത്രത്തിൽ കാണാം. ലവ് ഇമോജി മാത്രമാണ് ഫോട്ടോയ്ക്ക് മീനാക്ഷി നൽകിയിരിയ്ക്കുന്ന ക്യാപ്ഷൻ. ഫോട്ടോയുടെ കമന്റ് ബോക്‌സ് മീനാക്ഷി ഓഫ് ചെയ്തു വച്ചിരിക്കുകയാണ്. നേരത്തെയും കാവ്യയ്ക്ക് ഒപ്പമുള്ള ഫോട്ടോ പങ്കുവയ്ക്കുമ്പോൾ മീനാക്ഷി കമന്റ് ബോക്‌സ് ഓഫ് ചെയ്തിരുന്നു.

മലയാളികളുടെ പ്രിയപ്പെട്ട നടിയാണ് കാവ്യ മാധവൻ. ബാലതാരമായി സിനിമയിൽ എത്തിയ കാവ്യ പിന്നീട് നായികയായി തിളങ്ങുകയായിരുന്നു. സൂപ്പർ താരങ്ങളുടെ അടക്കം നായികയായി തിളങ്ങി. ദിലീപുമായുള്ള വിവാഹ ശേഷം സിനിമയിൽ നിന്നും വിട്ടു നിൽക്കുകയാണ് കാവ്യ. സോഷ്യൽ മീഡിയകളിലും നടി അധികം സജീവമല്ല. എന്നാൽ താരത്തിന്റെയും കുടുംബത്തിന്റെയും ചിത്രങ്ങൾ സോഷ്യൽ മീഡിയകളിൽ വൻ ഹിറ്റാകാറുണ്ട്. ഇവരുടെ മകൾ മഹാലക്ഷ്മിക്കും ആരാധകരേറെയാണ്.

സിനിമയിൽ ബാലതാരമായി അരങ്ങേറ്റം കുറിച്ച് പിന്നീട് ചന്ദ്രനുദിക്കുന്ന ദിക്കിൽ എന്ന ചിത്രത്തിലൂടെ നായികയായി മാറുകയായിരുന്നു. പിന്നീട് മലയാളസിനിമയിലെ തിരക്കേറിയ നടിയായി മാറിയ താരം കൂടുതലും ദിലീപിന്റെ നായികയായിട്ടാണ് അഭിനയിച്ചിട്ടുള്ളത്. മീശമാധവൻ, തെങ്കാശിപ്പട്ടണം, ഡാർലിംഗ് ഡാർലിംഗ്, ദോസ്ത്,സദാനന്ദന്റെ സമയം, റൺവേ, മിഴി രണ്ടിലും, കൊച്ചി രാജാവ്, ലയൺ, ചക്കര മുത്ത്, ഇൻസ്പെക്ടർ ഗരുഡ്, പാപ്പി അപ്പച്ചാ, വെള്ളരിപ്രാവിന്റെ ചങ്ങാതി, പിന്നെയും തുടങ്ങി 21 ഓളം ചിത്രങ്ങളിൽ ദിലീപിനൊപ്പം കാവ്യ നായികയായി അഭിനയിച്ചു.

അനന്തഭദ്രം, അപരിചിതൻ, ക്ലാസ്മേറ്റ്സ്, അതിശയൻ, നാലു പെണ്ണുങ്ങൾ, നാദിയ കൊല്ലപ്പെട്ട രാത്രി, കൊച്ചു കൊച്ചു സന്തോഷങ്ങൾ, രാക്ഷസ രാജാവ്, ഊമപ്പെണ്ണിന് ഉരിയാടാപയ്യൻ, പുലിവാൽ കല്യാണം, കംഗാരു, മാടമ്പി, ബനാറസ്, ബാവുട്ടിയുടെ നാമത്തിൽ തുടങ്ങിവയാണ് കാവ്യയുടെ ശ്രദ്ധേയമായ മറ്റു ചിത്രങ്ങൾ. മലയാളി തനിമയുള്ള നായിക എന്നാണ് ആരാധകർ കാവ്യയെ വിശേഷിപ്പിക്കാറുള്ളത്. ‘പിന്നെയും’ എന്ന അടൂർ ഗോപാലകൃഷ്ണൻ ചിത്രത്തിലാണ് ഏറ്റവും ഒടുവിൽ കാവ്യ അഭിനയിക്കുന്നത്.

പെരുമഴക്കാലം, ഗദ്ദാമ എന്നീ ചിത്രങ്ങളിലൂടെ മികച്ച നടിക്കുള്ള കേരള സംസ്ഥാന ചലച്ചിത്രപുരസ്കാരം രണ്ടു തവണ കാവ്യക്ക് ലഭിച്ചു. 2016 നവംബർ 25നായിരുന്നു ദിലീപുമായുള്ള കാവ്യയുടെ വിവാഹം നടക്കുന്നത്. 2019 ഒക്ടോബറിൽ ദിലീപിനും കാവ്യയ്ക്കുമൊരു പെൺകുഞ്ഞ് പിറന്നു. വിജയദശമി ദിനത്തിൽ ജനിച്ച മകൾക്ക് മഹാലക്ഷ്മി എന്നാണ് ദമ്പതികൾ പേരിട്ടിരിക്കുന്നത്