പിടികൂടിയ പാലിലെ മായം, ഭക്ഷ്യസുരക്ഷാ വിഭാ​ഗത്തിനെതിരെ മന്ത്രി ജെ ചിഞ്ചുറാണി

കൊല്ലം. കൊല്ലത്തെ ആര്യങ്കാവിൽ ക്ഷീരവികസന വകുപ്പ് പിടികൂടിയ പാലിൽ മായം കലർന്നിട്ടില്ലെന്ന ഭക്ഷ്യസുരക്ഷാ വകുപ്പിന്റെ കണ്ടെത്തലിനെതിരെ ക്ഷീരവികസന വകുപ്പ് മന്ത്രി ജെ ചിഞ്ചുറാണി. പാലിൽ ഹൈഡ്രജൻ പെറോക്സൈഡ് സാന്നിധ്യം കണ്ടെത്താൻ കഴിയാത്തതിൽ മറുപടി പറയേണ്ടത് ഭക്ഷ്യസുരക്ഷാ വകുപ്പാണെന്ന് മന്ത്രി ജെ ചിഞ്ചുറാണി പറഞ്ഞു.

പാലിൽ മായം കലർന്നുവെന്നത് ഉറപ്പാണ്. ക്ഷീരവികസന വകുപ്പ് നടത്തിയ പരിശോധന റിപ്പോർട്ട് തങ്ങളുടെ കൈവശമുണ്ടെന്നും ഫലം മാറാനുള്ള കാരണം പരിശോധന വൈകിയതാണോ എന്ന് പരിശോധിക്കണമെന്നും മന്ത്രി വ്യക്തമാക്കിയിരിക്കുകയാണ്. പരിശോധന വൈകിയതും, പരിശോധനയിലെ വീഴ്ചയും ആണ് മന്ത്രി ചിഞ്ചു റാണി ആരോഗ്യ വകുപ്പിന്റെ കീഴിലുള്ള ഭക്ഷ്യസുരക്ഷാ വകുപ്പിന്റെ മേൽ ആരോപിച്ചിട്ടുള്ളത്. സംഭവത്തിൽ ആരോഗ്യമന്ത്രിക്കും മുഖ്യമന്ത്രിക്കും കത്ത് നൽകും. ക്ഷീരവകുപ്പിന് നടപടിയെടുക്കാൻ അധികാരം നൽകണമെന്ന് ആവശ്യപ്പെടും – മന്ത്രി വിശദമാക്കി.

ആര്യങ്കാവിൽ പുലർച്ചെ അഞ്ചരയോടെ വാഹനം പിടികൂടിയതിനു പിന്നാലെ ക്ഷീരവികസന വകുപ്പ് നടത്തിയ പരിശോധനയിൽ മായം കലർന്നുവെന്ന് കണ്ടെത്തുകയായിരുന്നു. സംഭവത്തിൽ നടപടിയെടുക്കാൻ അധികാരമുള്ള ഭക്ഷ്യസുരക്ഷാ വകുപ്പിനെ വിവരം ഉടൻ തന്നെ അറിയിക്കുകയാണ് ചെയ്തത്. ഒൻപതു മണിയോടെ ഉദ്യോഗസ്ഥരെത്തി സാംപിൾ ശേഖരിച്ചു തിരുവനന്തപുരത്തേക്ക് എത്തിച്ചു. എന്നാൽ പാലിൽ മായം കലർന്നിട്ടില്ലെന്ന ഫലം വന്നുവെന്നു കഴിഞ്ഞ ദിവസം വൈകിട്ടാണ് മന്ത്രി ചിഞ്ചു റാണി അറിയുന്നത്. സംഭവത്തിൽ ഏതായാലും മറുപടി പറയേണ്ടത് ആരോഗ്യവകുപ്പിലെ ഭക്ഷ്യസുരക്ഷാ വിഭാഗമാണെന്നാണ് മന്ത്രി ചിഞ്ചു റാണി പറഞ്ഞിരിക്കുന്നത്.

‘ആറുമണിക്കൂർ മാത്രമേ പാലിൽ ഹൈഡ്രജൻ പെറോക്സൈഡ് നിലനിൽക്കൂ. ആര്യങ്കാവിൽ ചെക്ക്പോസ്റ്റിൽ ക്ഷീരവികസന വകുപ്പ് നടത്തിയ മൂന്നാമത്തെ പരിശോധനയിലാണ് പാലിൽ ഹൈഡ്രജൻ പെറോക്സൈസ് സാന്നിധ്യം കണ്ടെത്തിയത്. ഇതിനു ശേഷമാണ് ഭക്ഷ്യസുരക്ഷാ വിഭാഗത്തെ വിവരം അറിയിച്ചതിനെ തുടർന്നു ഉദ്യോഗസ്ഥരെത്തി സാംപിൾ ശേഖരിച്ചു മടങ്ങി. എപ്പോഴാണ് പരിശോധന നടത്തിയതെന്ന് ഭക്ഷ്യസുരക്ഷാ വിഭാഗത്തിനു മാത്രമേ അറിയൂ. സാംപിൾ ശേഖരിക്കാൻ വൈകിയതാകാം പരിശോധനാ ഫലം മാറിയത്.’ – മന്ത്രി ചിഞ്ചു റാണി പറഞ്ഞു.

‘സ്പോട്ടിൽ പരിശോധിക്കുക എന്നത് മാത്രമാണ് ക്ഷീരവികസന വകുപ്പിനുള്ള ചുമതല. മറ്റ് കാര്യങ്ങൾ ചെയ്യേണ്ടത് ഭക്ഷ്യസുരക്ഷാ വിഭാഗമാണ്. ചെക്കുപോസ്റ്റുകളിൽ ദേശീയ അംഗീകാരമുള്ള ലാബുകൾ തുടങ്ങേണ്ടതാണ്, അപ്പോൾ ഉടൻ തന്നെ ഫലം അറിയാൻ കഴിയും. അല്ലെങ്കിൽ ഫലത്തിനായി മണിക്കൂറുകളോളം കാത്തിരിക്കേണ്ട സ്ഥിതിയാണ്. മധ്യമേഖലയിലെങ്കിലും ലാബുകൾ കൊണ്ടുവരാൻ ശ്രമം നടത്തും’ – മന്ത്രി പറഞ്ഞു.