കരുവന്നൂര്‍ തട്ടിപ്പിനെ ന്യായീകരിച്ച് മന്ത്രി വിഎന്‍ വാസവൻ, ‘ഇപ്പൊ ശരിയാക്കിത്തരാം ഒരു പ്രശ്നവുമില്ലെന്ന മട്ടിൽ മന്ത്രി’.

തിരുവനന്തപുരം. കരുവന്നൂര്‍ സഹകരണ ബാങ്കില്‍ നടന്ന തട്ടിപ്പിനെ ന്യായീകരിച്ച് സഹകരണമന്ത്രി വിഎന്‍ വാസവൻ. കരുവന്നൂര്‍ സഹകരണ ബാങ്കിലെ നിക്ഷേപകര്‍ക്ക് ഒരു തരത്തിലുള്ള ആശങ്കയും വേണ്ടെന്നാണ് വാസവന്റെ പ്രസ്താവന. അവരുടെ നിക്ഷേപങ്ങള്‍ സുരക്ഷിതമാ ണെന്നും സഹകരണമന്ത്രി പറയുന്നു.

കരുവന്നൂർ ബാങ്കിൽ തട്ടിപ്പ് നടത്തിയത് സി പി എം നേതാക്കളാണ്. അടിച്ചെടുത്ത പണം അവർ കൊണ്ട് പോയി. അതെ പാട്ടി ഒരക്ഷരം പറയാൻ തയ്യാറാകാത്ത സഹകരണ മന്ത്രി ‘നിക്ഷേങ്ങള്‍ തിരികെ നല്‍കുന്നതിനായി സര്‍ക്കാര്‍ 35 കോടി രൂപ വകയിരുത്തിയിട്ടുണ്ടെന്നാണ് വീരവാദം മുഴക്കിയിരിക്കുന്നത്‌. കട്ടവനെ പിടിച്ച് പണം ഈടാക്കാൻ നിവർത്തിയില്ലാത്തനിനാലാവാം, ‘കേരള ബാങ്കില്‍ നിന്ന് 25 കോടി രൂപയും സഹകരണ വികസന ക്ഷേമനിധി ബോര്‍ഡില്‍ നിന്നും 10 കോടി രൂപയും’ വാങ്ങുമെന്നാണ് വാസവൻ പറഞ്ഞിരിക്കുന്നത്.

കരുവന്നൂര്‍ സഹകരണ ബാങ്കിന്റെ ആസ്തികളുടെ ഈടിന്മേലാണ് 25 കോടി രൂപ കേരള ബാങ്കിൽ നിന്ന് വാങ്ങുന്നത്. ബാങ്കിന്റെ കൈവശമുള്ള സ്വര്‍ണ്ണവും മറ്റു ബാധ്യതകളില്‍ പെടാത്ത സ്ഥാവരവസ്തുക്കൾ കേരള ബാങ്കിന് ഈടായി നല്‍കി കടമെടുക്കാനാണ് പരിപാടി.

ഈ സാഹചര്യത്തിലാണ് ഇതൊക്കെ ഒരു വലിയ സംഭവം ചെയ്തുകൂട്ടിയ പോലെ ‘നിക്ഷേപകര്‍ക്ക് ഒരു തരത്തിലുള്ള ആശങ്കയും വേണ്ട’ എന്ന് വാസവൻ മന്ത്രിയുടെ പ്രസ്താവന. നിക്ഷേപകരുടെ നിക്ഷേപത്തിന് എല്ലാവിധ സംരക്ഷണവും ലഭിക്കുമെന്നാണ് മന്ത്രി പറയുന്നത്. അതേസമയം, സിപിഎം നേതാക്കള്‍ നടത്തിയ കോടികളുടെ തട്ടിപ്പ് മറയ്ക്കാന്‍ സര്‍ക്കാര്‍ ഖജനാവില്‍ നിന്നും പണം എടുത്ത് ചിലവഴിക്കുന്ന മറ്റൊരു തട്ടിപ്പ് കൂടിയാണ് ഇത് വഴി നടക്കുന്നത്.