ന്യൂനപക്ഷ സ്കോളർഷിപ്പ് തുക 23.51 കോടിയാക്കി ഉയർത്തി

ന്യൂനപക്ഷ ക്ഷേമ സ്‌കോളര്‍ഷിപ്പു തുക സര്‍ക്കാര്‍ ഉയര്‍ത്തി. ഇതുവരെ എട്ട് സ്‌കോളര്‍ഷിപ്പിനായി 17.31 കോടിരൂപയാണ് ചെലവഴിച്ചിരുന്നത്. ഇത് 23.51 കോടിയായാണു സര്‍ക്കാര്‍ ഉയര്‍ത്തിയത്. ന്യൂനപക്ഷ സ്‌കോളര്‍ഷിപ്പുകള്‍ ജനസംഖ്യാനുപാതത്തില്‍ തീരുമാനിക്കാന്‍ ഹൈക്കോടതി ഉത്തരവിട്ടിരുന്നു. ഇതിന്റെ അടിസ്ഥാനത്തില്‍ കഴിഞ്ഞ മന്ത്രി സഭാ യോഗത്തിലും ഇക്കാര്യത്തില്‍ തീരുമാനം കൈക്കൊണ്ടിരുന്നു. എന്നാല്‍ നിലവില്‍ മുസ്ലിം പിന്നാക്കാവസ്ഥയെ കുറിച്ച് മാത്രമാണ് സംസ്ഥാനത്ത് പഠനം നടന്നതെന്ന കാരണത്താല്‍ സ്‌കോളര്‍ഷിപ്പ് അനുപാതത്തില്‍ തത്ക്കാലം മാറ്റം വരുത്തിയിട്ടില്ല. പകരം ക്രിസ്ത്യന്‍ വിഭാഗത്തിന്റെ തുക വര്‍ദ്ധിപ്പിക്കുകയാണ് സര്‍ക്കാര്‍ തത്വത്തില്‍ ചെയ്തത്. ക്രൈസ്തവ വിഭാഗത്തിന്റെ പ്രശ്നങ്ങൾ പഠിക്കാൻ ജെ ബി കോശി അധ്യക്ഷനായ ഒരു സമിതിയെ സർക്കാർ നിയമിച്ചിട്ടുണ്ട്.

ന്യൂനപക്ഷ ക്ഷേമ ഡയറക്ടറേറ്റ് നൽകുന്ന എട്ട് സ്‌കോളര്‍ഷിപ്പുകളിൽ സിഎച്ച് മുഹമ്മദ് കോയ സ്‌കോളര്‍ഷിപ്പാണ് ഏറ്റവും കൂടുതൽ തുക വിലയിരുത്തിയ സ്‌കോളര്‍ഷിപ്പ്. ഇതില്‍ 80:20 അനുപാതത്തില്‍ നല്‍കിയിരുന്നപ്പോള്‍ ആറരക്കോടിയോളം രൂപ മുസ്‌ലിം വിദ്യാര്‍ഥികള്‍ക്കും ഒന്നരക്കോടിയോളം ക്രൈസ്തവ വിഭാഗത്തിനുമാണ് ലഭിച്ചിരുന്നത്. മുസ്‌ലിം വിഭാഗത്തിനുള്ള ഈ വിഹിതം കുറയാതിരിക്കാനായി സി.എച്ച്. സ്‌കോളര്‍ഷിപ്പ് എട്ടുകോടിയില്‍നിന്ന് പത്തുകോടിയായി ഉയര്‍ത്തുകയാണ് സര്‍ക്കാര്‍ ചെയ്തത്. ഇതനുസരിച്ച് മുസ്‌ലിം വിദ്യാര്‍ഥികള്‍ക്ക് ആറരക്കോടി രൂപതന്നെ ലഭിക്കും. ഒപ്പം ക്രൈസ്തവ വിഭാഗത്തിനുള്ള വിഹിതം ഒന്നരക്കോടിയില്‍നിന്ന് നാലരക്കോടിയായി ഉയര്‍ത്തുകയും ചെയ്തു.