വെല്ലുവിളികളെ പൊരുതി തോല്‍പ്പിച്ച മിനുവിന് മിന്നും ജയം

കോട്ടയം: ജീവിതത്തില്‍ പല വെല്ലുവിളികളും നേരിടേണ്ടി വന്നവരില്‍ ഒരാളാണ് മിനു. ഇപ്പോള്‍ ജീവിത പ്രതിസന്ധികളെയും ഇല്ലായ്മകളെയും എല്ലാം തോല്‍പ്പിച്ച് മിനുവിന് എസ് എസ് എല്‍ സി ഫലം വന്നപ്പോള്‍ മിന്നും വിജയമാണ്. അരയ്ക്ക് താഴേക്ക് പൂര്‍ണമായും തളര്‍ന്ന് പരസഹായം കൊണ്ടുപോലും ഒരടി നടക്കാന്‍ മിനുവിന് സാധിക്കില്ല. എന്നിരുന്നാലും പഠിക്കാന്‍ മിടുക്കിയാണ് മിനു. എസ് എസ് എല്‍ സി പരീക്ഷയില്‍ എല്ലാ വിഷയത്തിനും എ പ്ലസ് നേടിയിരിക്കുകയാണ് മിനു.

കടുത്തുരുത്തി കെ.എസ്.പുരം കാവുങ്കല്‍ ബാബു- മിസി ദമ്പതികളുടെ മൂത്ത മകളാണ് മിനു. കടുത്തുരുത്തി സെന്റ് മൈക്കിള്‍സ് എച്ച്.എസ്.എസിലെ വിദ്യാര്‍ത്ഥിയാണ്. മാതാപിതാക്കള്‍ എടുത്തുകൊണ്ടാണ് മിനു സ്‌കൂളിലേക്ക് വരുകയും പോവുകയും ചെയ്തിരുന്നത്. ഓട്ടോ ഡ്രൈവറാണ് മിനുവിന്റെ പിതാവ് ബാബു. സ്‌കൂള്‍ കവാടം വരെ മിനുവിനെ ഓട്ടോയില്‍ കൊണ്ടുപോകും, അവിടുന്ന് പരീക്ഷാ ഹാളിലെ ബെഞ്ചില്‍ എടുത്ത് കൊണ്ടിരുത്തു. വീട്ടില്‍ മിനുവിന് വീല്‍ ചെയര്‍ ഉണ്ട്.

കുടുംബം നേരത്തെ കഴിഞ്ഞിരുന്നത് ഒരു ഷെഡില്‍ ആയിരുന്നു. സ്‌കൂളിന്റെ നേതൃത്വത്തില്‍ ചെറിയ വീട് ഒരെണ്ണം നിര്‍മിച്ച് നല്‍കി. ടിവിയിലും ഓണ്‍ലൈനിലുമായായിരുന്നു മിനു പഠിച്ചത്. സ്‌കൂള്‍ അധികൃതരുടെയും മാതാപിതാക്കളുടെയും പൂര്‍ണ പിന്തുണയുള്ളതിനാലാണ് എല്ലാ വിഷയത്തിനും എ പ്ലസ് നേടാന്‍ കഴിഞ്ഞതെന്നു മിനു പറയുന്നു. ഇരുന്നു പഠിക്കാന്‍ വീട്ടില്‍ ഒരു കസേരയും ഡെസ്‌കും ഇല്ല. അതു വാങ്ങണം എന്നാണ് മിനുവിന്റെ ആഗ്രഹം.