12 മണിക്കൂർ നീണ്ട രക്ഷാപ്രവര്‍ത്തനം ഫലംകണ്ടില്ല , കിണറ്റിൽ കുടുങ്ങിയ വയോധികൻ മരിച്ചു

ചെങ്ങന്നൂർ : കിണർ വൃത്തിയാക്കാനിറങ്ങി കിണറ്റിലെ റിങ്ങുകൾക്കിടയിൽ കാൽ കുടുങ്ങിയ വയോധികൻ മരണത്തിന് കീഴടങ്ങി. പെരുങ്കുഴി കൊച്ചുവീട്ടിൽ കെ.എസ്. യോഹന്നാൻ (72) ആണ് മരിച്ചത്. അഗ്നിരക്ഷാ സേനയും പൊലീസും ഐടിബിപിയും ചേർന്നു നടത്തിയ തീവ്രശ്രമങ്ങൾക്കൊടുവിൽ രാത്രി ഒൻപതരയോടെ അദ്ദേഹത്തെ പുറത്തെടുത്തെങ്കിലും ജീവൻ നഷ്ടമായി. കിണർ വൃത്തിയാക്കാനാണു യോഹന്നാൻ സഹായിക്കൊപ്പം ഇറങ്ങിയത്. കാടും പടർപ്പും വൃത്തിയാക്കി പമ്പ് സെറ്റ് ഉപയോഗിച്ചു വെള്ളം വറ്റിക്കുന്നതിനിടെ കിണർ ഇടിഞ്ഞു.

കാൽ റിങ്ങുകൾക്കിടയിൽ പെട്ടതോടെ അദ്ദേഹം മുകളിലേക്ക് കയറാൻ പറ്റാത്ത അവസ്ഥയിലായി. 6 റിങ്ങുകൾ കാലിനു മുകളിലായതു രക്ഷാപ്രവർത്തനം ദുഷ്കരമാക്കി. അപകടസമയത്തു സഹായി കിണറിനു മുകളിലായിരുന്നു. യോഹന്നാന് ഓക്സിജൻ നൽകിയ ശേഷം റിങ്ങുകൾ ഒന്നൊന്നായി പൊട്ടിച്ചു മാറ്റി ആളെ രക്ഷിക്കാനായിരുന്നു ശ്രമം. എന്നാൽ ഇതിനിടെ കിണറ്റിൽ വെള്ളം പൊങ്ങുന്നതും തിരിച്ചടിയായി.

വെള്ളം വറ്റിക്കാൻ ശ്രമിച്ചപ്പോൾ മണ്ണിടിഞ്ഞു. 7 മണിയോടെ യോഹന്നാന്റെ പ്രതികരണം നിലച്ചു. തുടർന്ന് ഓക്സിജൻ സിലിണ്ടറും മറ്റും തിരിച്ചെടുത്തു. കഴുത്തിനു താഴെ വരെ ചെളിയിലും വെള്ളത്തിലും പൂണ്ടുനിൽക്കുകയായിരുന്നു. അദ്ദേഹം. പുറത്തെടുത്തപ്പോഴേക്കും ജീവൻ നിലച്ചിരുന്നു.