മൊബൈൽ ഫോൺ പൊട്ടിത്തെറിച്ച് അപകടം, നാലു കുട്ടികൾ മരിച്ചു, മാതാപിതാക്കൾ ആശുപത്രിയിൽ

മീററ്റ് : മൊബൈൽ ഫോൺ പൊട്ടിത്തെറിച്ചുണ്ടായ അപകടത്തിൽ നാലു കുട്ടികൾ മരിച്ചു. ചാർജ് ചെയ്യുന്നതിനിടെ ആയിരുന്നു പൊട്ടിത്തെറി ഉണ്ടായത്. കുട്ടികളുടെ മാതാപിതാക്കളുടെ നില ഗുരുതരമായി തുടരുകയാണ്. മീററ്റ് മോദിപുരം മേഖലയിലാണ് സംഭവം.

ശക്തമായ സ്‌ഫോടനമാണുണ്ടായതെന്നും, തീ മുറിയിലാകെ പടർന്നുവെന്നും പോലീസ് പറഞ്ഞു. മുറിയിലുണ്ടായിരുന്ന നാല് കുട്ടികളും തീയിൽ കുടുങ്ങി. കുട്ടികളെ രക്ഷിക്കാനുള്ള ശ്രമത്തിനിടെ രക്ഷിതാക്കൾക്കും പൊള്ളലേൽക്കുകയായിരുന്നു. ഷോർട്ട് സർക്യൂട്ടിനെ തുടർന്നാണ് ചാർജ് ചെയ്യാൻ വച്ച മൊബൈൽ ഫോൺ പൊട്ടിത്തെറിച്ചതെന്നാണ് പോലീസിന്റെ വിലയിരുത്തൽ.

തീ നിയന്ത്രണ വിധേയമാക്കിയ ശേഷമാണ് ഇവരെ ആശുപത്രിയിൽ എത്തിച്ചത് . എന്നാൽ കുട്ടികക്കെ രക്ഷിക്കാനായില്ല. കല്ലു (5), ഗോലു (6), നിഹാരിക (8), സരിക (12) എന്നിവരാണ് ചികിത്സയ്‌ക്കിടെ മരിച്ചത് . മെഡിക്കൽ കോളേജിൽ ചികിത്സയിലുള്ള പിതാവ് ജോണി അപകടനില തരണം ചെയ്തിട്ടുണ്ടെന്നും എന്നാൽ ഭാര്യ ബബിതയുടെ നില ഗുരുതരമായി തുടരുകയാണ്.