അഭിനന്ദനങ്ങൾ പ്രിയപ്പെട്ടവനെ, സുരേഷ് ഗോപിക്ക് ആശംസകളുമായി മോഹൻലാൽ

തിരുവനന്തപുരം: ലോക്‌സഭാ തെരഞ്ഞെടുപ്പിൽ വിജയിച്ച സുരേഷ് ഗോപിയ്‌ക്ക് ആശംസയുമായി മോഹൻലാൽ. ഫേസ്ബുക്കിൽ സുരേഷ് ഗോപിയുടെ ചിത്രത്തോടൊപ്പം അഭിനന്ദനങ്ങൾ സുരേഷ് എന്ന അടിക്കുറിപ്പോടെയാണ് ലാലേട്ടൻ ആശംസയറിച്ചിരിക്കുന്നത്.

ഗായിക അഭിരാമി സുരേഷ്, നടി മുക്ത ജോർജ്, ബീന ആന്റണി, വീണ നായർ, ഭാമ, ജോതി കൃഷ്ണ തുടങ്ങിയവർ നേരത്തെ ആശംസകളറിയിച്ചിരുന്നു.‘ബിഗ് ബ്രദർ സുരേഷ്ഗോപി. ആശംസകൾ.

തൃശൂർ അങ്ങെടുത്തു’ എന്നാണ് മുക്ത ഇൻസ്റ്റഗ്രാമിൽ കുറിച്ചത്. മകൾ കണ്മണിക്കും, ഭർത്താവ് റിങ്കു ടോമിക്കുമൊപ്പം സുരേഷ് ഗോപിയുടെ കൂടെ നിൽക്കുന്ന ചിത്രം മുക്ത പോസ്റ്റ് ചെയ്തിട്ടുണ്ട്. ഞങ്ങൾ പ്രതീക്ഷിച്ച വിജയം. ഞങ്ങൾ ആഗ്രഹിച്ച വിജയം. ഞങ്ങൾ നിങ്ങൾക്കൊപ്പം, സുരേഷേട്ടാ’ എന്ന് ബീന ആന്റണിയും ഇൻസ്റ്റഗ്രാമിൽ പങ്കുവച്ചിട്ടുണ്ട്.

തൃശൂരിൽ 4,12,338 വോട്ടുകളാണ് സുരേഷ് ഗോപി നേടിയത്. 74,686 വോട്ടിന്റെ ഭൂരിപക്ഷത്തിലായിരുന്നു ജയം. മണ്ഡലത്തിലെ പ്രജാ ദൈവങ്ങൾക്കും പാർട്ടി പ്രവർത്തകർക്കും നന്ദി.

ഈ വിജയത്തോടെ വരുന്ന തെരഞ്ഞെടുപ്പുകളിൽ ബിജെപി കേരളത്തിൽ ശക്തമായ സ്വാധീനം ചെലത്തുമെന്ന് സുരേഷ് ഗോപി പറഞ്ഞു. തൃശൂരിലെ കറ തീർന്ന മതേതര വോട്ടുകളാണ് തനിക്ക് കിട്ടിയത്. ഒരു വർഗീയ പ്രചാരണവും താൻ നടത്തിയിട്ടില്ല. പാർട്ടിയുടെ നല്ല അനുസരണയുള്ള പ്രവർത്തകനും എംപിയും ആയിരിക്കുമെന്നും അദ്ദേഹം കൂട്ടിച്ചേർത്തു.