ഒറ്റയ്ക്കാണെന്ന തോന്നല്‍ വേണ്ട, പ്രവാസികള്‍ക്ക് ആശ്വാസമായി മോഹന്‍ലാല്‍, വീഡിയോ

കൊറോണ വൈറസിന് എതിരെയുള്ള പോരാട്ടത്തിലാണ് ലോകം മുഴുവന്‍. ലോകത്ത് പല രാജ്യങ്ങളും ലോക്ക് ഡൗണ്‍ പ്രഖ്യാപിച്ചിരിക്കുകയാണ്. ഇതോടെ ഏറെ ദുരിതത്തിലായത് പ്രവാസികളാണ്. ഉറ്റവരെ ഒന്ന് കാണാനോ അവരോട് ഒന്ന് ഭയമില്ലാതെ സംസാരിക്കാനോ പോലും ഇവര്‍ക്ക് ആകുന്നില്ല. നാട്ടിലെ കുടുംബത്തെ കുറിച്ച് ആശയ്‌ക്കൊപ്പം ജോലി നഷ്ടപ്പെടുമോ എന്ന ഭയവും പ്രവാസികളെ അലട്ടുന്നുണ്ട്.

ഇപ്പോള്‍ പ്രവാസി മലയാളികള്‍ക്ക് ധൈര്യം പകരുകയാണ് നടന്‍ മോഹന്‍ലാല്‍. തന്റെ ഫേയ്‌സ്ബുക്ക് പേജില്‍ പോസ്റ്റ് ചെയ്ത വിഡിയോയിലൂടെയാണ് താരം ആശ്വാസമായത്. ആരും കൂടെയില്ലെന്ന തോന്നല്‍ വേണ്ടെന്നും ഞങ്ങളെല്ലാവരുമുണ്ട് എന്നാണ് താരം പറയുന്നത്. നാമൊരുമിച്ച് ദുഃഖിക്കുന്ന കാലവും കടന്നുപോകുമെന്നും മോഹന്‍ലാല്‍ കുട്ടിച്ചേര്‍ത്തു.

മലയാളികള്‍ ഏറെയുള്ള ഗള്‍ഫ് രാജ്യങ്ങളിലും അമേരിക്കയിലുമെല്ലാം കൊവിഡ് വലിയ പ്രതിസന്ധിയാണ് സൃഷ്ടിക്കുന്നത്. കോടിക്കണക്കിന് പേര്‍ക്ക് ജോലി നഷ്ടപ്പെടും എന്നാണ് കണക്കാക്കുന്നത്. ഇത് പ്രവാസികളെ ആശങ്കയിലാക്കിയിരിക്കുകയാണ്.

മോഹന്‍ലാലിന്റെ വാക്കുകള്‍ ഇങ്ങനെ;

നമുക്ക് കാണാന്‍ പോലുമാകാത്ത ശത്രുവിനെതിരെ പോരാടാന്‍ കൈകഴുകിയും മാസ്‌ക് ധരിച്ചും സാമൂഹ്യ അകലം പാലിച്ചും പോരാടുകയാണ് നാം. പ്രവാസി മലയാളികളോടായി പറയട്ടെ. നിങ്ങളുടെ അവിടുത്തെ ഭരണാധികാരികള്‍ സുരക്ഷയ്ക്ക് വേണ്ടി ഒട്ടേറെ നടപടികള്‍ ചെയ്തിട്ടുണ്ട്. അതെല്ലാം പാലിക്കണം. നാട്ടിലുള്ള കുടുംബങ്ങളെ ഓര്‍ത്ത്, ജോലിയിലെ പ്രശ്‌നങ്ങളെ ഓര്‍ത്ത്, സുരക്ഷിതത്വത്തെ ഓര്‍ത്ത് തനിച്ച് ദു;ഖിക്കുകയാവും നിങ്ങള്‍. എന്നാല്‍ കൂടെ ആരുമില്ല എന്ന തോന്നല്‍ മനസ്സില്‍ നിന്നെടുത്തു മാറ്റൂ. ഞങ്ങളെല്ലാവരുമുണ്ട്. ശാരീരിക അകലം പാലിക്കുന്നുവെങ്കിലും മനസ്സുകൊണ്ട് നാം എത്രയോ അടുത്താണ്. ഉള്ളില്‍ മുളപൊട്ടുന്ന അശുഭ ചിന്തകളെ ഇപ്പോള്‍ തന്നെ പറിച്ചുകളയൂ. സ്ഥായിയായി ഒന്നുമില്ലല്ലോ. ഈ നിമിഷവും കടന്നു പോകും. ഒരുമിച്ച് ആഹ്ലാദിച്ചിരുന്ന നിമിഷങ്ങള്‍ പോലെ നാമൊരുമിച്ച് ദു:ഖിക്കുന്ന ഈ സങ്കടകാലവും കടന്നു പോകും. നമ്മളൊരുമിച്ച് കൈകോര്‍ത്ത് വിജയഗീതം പാടും.