അമ്മയും മകനും ട്രെയിനിന് മുന്നിൽ ചാടി, ദാരുണാന്ത്യം

കൊല്ലത്ത് അമ്മയും ഒരുവയസ്സുള്ള കുഞ്ഞും ട്രെയിൻ ഇടിച്ച്‌ മരിച്ചു. പരവൂർ ഒഴുകുപാറ ഉത്രാടത്തിൽ ശ്രീലക്ഷ്മി (27), മകൻ ആരവ് എന്നിവരാണ് മരിച്ചത്. ഞായർ വൈകിട്ട് 4.30ന് പരവൂർ ഒല്ലാൽ റെയിൽവേ ക്രോസിനു സമീപമാണ്‌ അപകടം. തിരുവനന്തപുരത്തേക്ക്‌ പോകുകയായിരുന്ന നേത്രാവതി എക്‌സ്‍പ്രസാണ്‌ ഇടിച്ചത്‌. ഞായർ പകൽ മൂന്നിന് ഭർതൃവീട്ടിലേക്കു പോകാൻ സ്വന്തം വീട്ടിൽനിന്ന്‌ ഇറങ്ങിയതാണ്‌ ശ്രീലക്ഷ്മി. എന്നാൽ, ഒഴുകുപാറയിൽനിന്ന് പരവൂർ ഒല്ലാൽ റെയിൽവേ ക്രോസിൽ എത്തുകയായിരുന്നുവെന്ന്‌ പറയുന്നു.

ആത്മഹത്യയാണെന്നാണ്‌ പ്രാഥമിക നിഗമനം. വിശദവിവരങ്ങൾ പരവൂർ പൊലീസ് ശേഖരിച്ചുവരികയാണ്. മടവൂർ സ്വദേശി ഗ്രിന്റോ ഗിരീഷാണ് ശ്രീലക്ഷ്മിയുടെ ഭർത്താവ്. ഒന്നരവർഷം മുമ്പായിരുന്നു ഇവരുടെ വിവാഹം. വിവാഹശേഷം ശ്രീലക്ഷ്മിയും ഭർത്താവിനൊപ്പം വിദേശത്തായിരുന്നു. പ്രസവശേഷമാണ് തിരികെ നാട്ടിലെത്തിയത്. മൃതദേഹങ്ങൾ കൊല്ലം മെഡിക്കൽ കോളേജ് ആശുപത്രിയിലേക്ക് മാറ്റി. സംസ്കാരം തിങ്കൾ പകൽ ഒഴുകുപാറയിലെ വീട്ടുവളപ്പിൽ. സജീവാണ് ശ്രീലക്ഷ്മിയുടെ അച്ഛൻ. അമ്മ: സുനിത.