നാടകം കണ്ട് ആരാധന കാരണം അച്ഛന്റെ അഡ്രസ് പറഞ്ഞ് വേണു ചേട്ടനെ പോയി കണ്ട് പരിചയം പുതുക്കുമായിരുന്നുവെന്ന് മുകേഷ്

സിനിമാ നടനാകും മുന്നേ തനിക്ക് വളരെ പരിചയമുള്ളയാളാണ് നെടുമുടി വേണു എന്ന് എംഎല്‍എയും നടനുമായ മുകേഷ്. ആദ്യ കാലങ്ങളില്‍ അദ്ദേഹത്തിന് ഒരു മിമിക്രി/മോണോ ആക്ട് ട്രൂപ്പുണ്ടായിരുന്നു. അവിടെ വച്ച് അഭിനയം കൊണ്ടും കഴിവ് കൊണ്ടും തന്നെ വളരെ അധികം വിസ്മയിപ്പിച്ചയാളാണ് നെടുമുടി വേണു. പിന്നീട് ചാക്യാര്‍ കൂത്ത് കണ്ടിട്ടുണ്ട് അതിലും അദ്ദേഹം തന്നെ വിസ്മയിപ്പിച്ചുവെന്നും എംഎല്‍എയും നടനുമായ മുകേഷ് പറഞ്ഞു.

അന്ന് തുടങ്ങിയ ആരാധനയാണ് ഇപ്പോഴും തുടരുന്നതും. ശരിക്കും അദ്ദേഹത്തോടുള്ള ആരാധന അതിന്റെ ക്ലൈമാക്‌സില്‍ എത്തുന്നത് കൊല്ലം വിമന്‍സ് കോളജില്‍ കാവാലം നാരായണ പണിക്കര്‍ സാറിന്റെ നാടകം അരങ്ങേറി അത് മോഡേണ്‍ നാടകം എന്ന് അറിഞ്ഞിട്ട് അത് കാണാന്‍ പോയി അത്ഭുതപ്പെട്ട അനുഭവം ഞാന്‍ ഇപ്പോഴും ഓര്‍ക്കുന്നതായി മുകേഷ് പറഞ്ഞു.

പിന്നീട് എന്റെ അച്ഛന്റെ അഡ്രസ് പറഞ്ഞു പലപ്പോഴായി അദ്ദേഹത്തെ പോയി പരിചയപ്പെടുമായിരുന്നു. ഞാന്‍ സിനിമയില്‍ വന്നതിന് ശേഷം അന്നുമുതല്‍ ഈ നിമിഷം വരെ ജീവിതത്തിലെ എല്ലാ കാര്യങ്ങളിലും എന്റെ സ്വന്തം സഹോദരന്‍ തന്നെയായിരുന്നു നെടുമുടി വേണു. സിനിമയിലുള്ള എല്ലാകാര്യത്തിലും അദ്ദേഹം വളരെ വലിയ രീതിയിലുള്ള സഹായങ്ങളും ചെയ്തിട്ടുണ്ട്. ലോകമെമ്പാടും ഞാന്‍ അദ്ദേഹവുമായി സഞ്ചരിച്ചിട്ടുണ്ട്. ഒരുപാട് സ്റ്റേജ് ഷോകള്‍ ചെയ്തിട്ടുണ്ട്. നാടകം സിനിമ ചാനല്‍ ഷോകള്‍ തുടങ്ങിയ എല്ലാ കാര്യങ്ങളിലും ഉപദേശം നല്‍കിയിരുന്നു. അദ്ദേഹത്തിന്റെ വിയോഗം അവിശ്വസനീയം വളരെ ഖേദിക്കുന്നു എന്നും മുകേഷ് പ്രതികരിച്ചു.

ഇന്ന് ഉച്ചയോടെയാണ് നെടുമുടി വേണുവിന്റെ മരണവാര്‍ത്ത പുറത്ത് വരുന്നത്. തിരുവന്തപുരം കിംസ് ആശുപത്രിയിലായിരുന്നു അന്ത്യം. ഇന്ത്യന്‍ സിനിമയിലെ തന്നെ പ്രതിഭാധനന്മാരായ അഭിനേതാക്കളില്‍ ഒരാളായി കണക്കാക്കപ്പെടുന്ന നെടുമുടി വേണു നാടകങ്ങളിലും അഞ്ഞൂറിലേറെ സിനിമകളിലും അഭിനയിച്ചിട്ടുണ്ട്.