കൊല്ലത്ത് മുകേഷ് തന്നെ സ്ഥാനാർഥി

കൊല്ലത്ത് എംഎൽഎമാരായ എം മുകേഷ്, എം. നൗഷാദ് എന്നിവർ വീണ്ടും മത്സരിക്കുമെന്ന് സിപിഎം കൊല്ലം ജില്ലാ സെക്രട്ടേറിയറ്റ് തീരുമാനിച്ചു. അതേസമയം, മന്ത്രി മേഴ്സിക്കുട്ടിയമ്മയ്ക്ക് ഒരവസരം കൂടി നൽകണമെന്ന് ജില്ലാ സെക്രട്ടേറിയറ്റ് സംസ്ഥാന നേതൃത്വത്തോട് ആവശ്യപ്പെട്ടു. മേഴ്സികുട്ടിയമ്മ മത്സരിക്കുന്നില്ലെങ്കിൽ എസ് എൽ സജികുമാറിനെയോ ചിന്താ ജെറോമിനേയോ മത്സരിപ്പിക്കണമെന്ന ആവശ്യവും ഉയർന്നിട്ടുണ്ട്. കൊട്ടാരക്കരയിൽ കെഎൻ ബാലഗോപാലിനെ മൽസരിപ്പിക്കണമെന്നാണ് ആവശ്യം. സിറ്റിംഗ് എംഎൽഎ ഐഷ പോറ്റിയുടെ പേരും പരിഗണനയിലുണ്ട്. പത്തനാപുരത്ത് ഗണേഷ് കുമാർ തന്നെ മത്സരിക്കും.

ചവറയിൽ ഡോ.സുജിത്ത് വിജയനെ സ്ഥാനാർത്ഥിയാക്കാനും ജില്ലാ സെക്രട്ടേറിയേറ്റിൽ ധാരണയായി. എന്നാൽ സുജിത്ത് വിജയൻ്റെ ചിഹ്നം സംബന്ധിച്ച തീരുമാനം സംസ്ഥാന നേതൃത്വത്തിന് വിട്ടിരിക്കുകയാണ്. കുന്നത്തൂർ സിപിഎം ഏറ്റെടുക്കേണ്ടതില്ലെന്നും ജില്ലാ സെക്രട്ടേറിയറ്റിൽ തീരുമാനിച്ചു. അവിടെ കോവൂർ കുഞ്ഞുമോനെ പിന്തുണയ്ക്കും.