ഇനിയില്ലെന്ന് പറഞ്ഞ് മടങ്ങി, തിരിച്ചു വിളിച്ച് കമ്പനി ഉടമ, മുരളീധരന്‍ മടങ്ങിയത് മരണത്തിലേക്ക്‌

കുടുംബത്തിനൊപ്പം വിശ്രമ ജീവിതം നയിക്കാനായിരിക്കെയാണ് പത്തനംതിട്ട വള്ളിക്കോട് വാഴമുട്ടം സ്വദേശി പി വി മുരളീധരൻ്റെ അപ്രതീക്ഷിത മരണം. ജോലി അവസാനിപ്പിച്ച് നാട്ടിലെത്തിയതായിരുന്നു മുരളീധരൻ, ഇനി തിരിച്ച് പോകുന്നില്ല എന്നു പറഞ്ഞാണ് വീട്ടിൽ എത്തിയത്. എന്നാൽ കുവൈറ്റിൽ ജോലി ചെയ്തിരുന്ന കമ്പനിയിൽ നിന്ന് ഒരുമാസം തികയും മുൻപ് വീണ്ടും തിരിച്ച് വരാൻ കമ്പനി ഉടമ മുരളീധരനെ വിളിക്കുകയായിരുന്നു. ആറു മാസംകൂടി നിന്നിട്ടു മടങ്ങിക്കോളൂ എന്നു പറഞ്ഞാണ് കമ്പനി വിളിച്ചത്. എന്ത് വന്നാലും നവംബറിൽ മടങ്ങിപ്പോരും എന്നു പറഞ്ഞാണ് മുരളീധരൻ ഫെബ്രുവരിയിൽ വീണ്ടും പോയത്. കൊവിഡ് കാലത്ത് എല്ലാം ഉപേക്ഷിച്ചു വന്നിട്ടും കമ്പനി മേധാവി നേരിട്ടു വിളിച്ചതോടെ അന്നും തിരികെ ജോലിയിൽ പ്രവേശിച്ചിരുന്നു

ബുധനാഴ്ചയാണ് കുവൈറ്റിലെ മംഗെഫ് ബ്ലോക്ക് നാലില്‍ പ്രവാസി മലയാളിയുടെ ഉടമസ്ഥതയിലുള്ള എന്‍ബിടിസി കമ്പനിയിലെ ജീവനക്കാരുടെ താമസക്കെട്ടിടത്തില്‍ അഗ്‌നിബാധയുണ്ടായത്. അപകടത്തില്‍ മരിച്ചത് 49 ഇന്ത്യക്കാരെന്നാണ് ഔദ്യോഗിക സ്ഥിരീകരണം. ഇതില്‍ 46 പേരെ തിരിച്ചറിഞ്ഞു.അപകടത്തിൽ മരിച്ച 23 മലയാളികളുടെ മൃതദേഹങ്ങൾ രാവിലെ പത്തരയോടെ നെടുമ്പാശ്ശേരി വിമാനത്താവളത്തിലെത്തിക്കും.

സംസ്ഥാന സർക്കാരിനെ പ്രതിനിധീകരിച്ച് മുഖ്യമന്ത്രി പിണറായി വിജയനും മന്ത്രിമാരും മൃതദേഹം ഏറ്റുവാങ്ങാൻ വിമാനത്താവളത്തിലെത്തും. കേന്ദ്ര സഹമന്ത്രി സുരേഷ് ഗോപിയും വിമാനത്താവളത്തും. വ്യോമസേനയുടെ പ്രത്യേക വിമാനത്തിലാണ് മൃതദേഹങ്ങള്‍ എത്തിക്കുക. നെടുമ്പാശ്ശേരിയിൽ എത്തിക്കുന്ന മൃതദേഹങ്ങൾ പ്രത്യേകം ക്രമീകരിച്ച ആംബുലൻസുകളിലാണ് വീടുകളിലെത്തിക്കുക.