വി.മുരളീധരൻ കേരളത്തിന്റെ അംബാസഡർ – മുസ്ലിംലീഗ് എംപി അബ്ദുള്‍ വഹാബ്

ന്യൂഡൽഹി. കേന്ദ്രമന്ത്രി വി.മുരളീധരനെ രാജ്യസഭയിൽ പുകഴ്‍‌ത്തി മുസ്‍ലിം ലീഗ്. കേന്ദ്ര സഹമന്ത്രി വി. മുരളീധരനെ പ്രശംസിച്ച് മുസ്ലിം ലീഗ് എം.പി അബ്ദുള്‍ വഹാബ്. മുരളീധരന്‍ ഡല്‍ഹിയിലെ കേരളത്തിന്റെ ബ്രാന്‍ഡ് അംബാസഡറാണെന്നായിരുന്നു എംപിയുടെ പരാമര്‍ശം. വി.മുരളീധരന്‍ മികച്ച രീതിയില്‍ പ്രവര്‍ത്തിക്കുന്നുണ്ടെന്നും സംസ്ഥാന സര്‍ക്കാരിനെതിരായ മുരളീധരന്റെ പ്രസ്താവനകളില്‍ യാഥാര്‍ഥ്യമുണ്ടെന്നും വഹാബ് രാജ്യസഭയില്‍ പറയുകയുണ്ടായി.

വി.മുരളീധരൻ മികച്ച രീതിയിൽ പ്രവർത്തിക്കുന്നു. ഡൽഹിയിൽ അദ്ദേഹം കേരളത്തിന്റെ അംബാസഡറാണ്. എന്നാൽ കേരളത്തിൽ എത്തിയാൽ സംസ്ഥാന സർക്കാരിനെതിരെ സംസാരിക്കും. കേരളത്തിനെതിരേ റോഡുമായി ബന്ധപ്പെട്ട വിമര്‍ശനങ്ങളും അദ്ദേഹം ഉന്നയിക്കുന്നുണ്ട്. അതില്‍ വാസ്തവമുണ്ട്. മുരളീധരന്റെ വിമർശനങ്ങളിൽ വാസ്തവം ഉണ്ട് – ലീഗ് എംപി പി.വി.അബ്‌ദുൽ വഹാബ് പറഞ്ഞു. വി. മുരളീധരനെതിരായ ജോണ്‍ ബ്രിട്ടാസ് എം.പിയുടെ വിമര്‍ശങ്ങള്‍ തള്ളിക്കൊണ്ടായിരുന്നു വഹാബിന്റെ പ്രതികരണം.

വി.മുരളീധരനെ സിപിഎം എംപി ജോണ്‍ ബ്രിട്ടാസ് വിമര്‍ശിച്ചിരുന്നു. കേരളത്തിലെ വികസനം തടസ്സപ്പെടുത്തുകയാണു കേന്ദ്രമന്ത്രി ചെയ്യുന്നത്. നോട്ടുനിരോധനകാലത്ത് കേരളത്തില്‍വന്നു പറഞ്ഞതെല്ലാം കേന്ദ്രമന്ത്രി മറന്നുവെന്നും ബ്രിട്ടാസ് കുറ്റപ്പെടുത്തിയിരുന്നു. ഇതിലാണ് മുസ്ലിംലീഗ് തിരുത്തല്‍ വരുത്തിയിരിക്കുന്നത്.

അടുത്തിടെ മുസ്‌ലിം ലീഗിനെ സ്തുതിച്ച സിപിഎം നിലപാടിനെ കടുത്ത ഭാഷയിൽ വിമർശിച്ച് വി.മുരളീധരൻ രംഗത്തുവന്നിരുന്നു. കേരളത്തിലെ ഇടതുമുന്നണി നേതാക്കളുടെ പ്രസ്താവനകൾ കാലത്തിന് അനുസരിച്ചുള്ള കോലം കെട്ടൽ മാത്രമാണ്. ലീഗിനെ വർഗീയ പാർട്ടിയാക്കേണ്ടപ്പോൾ അങ്ങനെയും അല്ലാത്തപ്പോൾ മറിച്ചും ചിത്രീകരിക്കുന്നവരാണു സിപിഎമ്മുകാർ എന്നായിരുന്നു മുരളീധരൻ പറഞ്ഞിരുന്നത്.